އަފްރާޝީމުގެ މަރާއިމެދު ކުރެވޭ ކުށް ހީނތައް...

އަލްމަރުޙޫމް އަފްރާޝީމް ޢަލީ އަކީ އުނގޫފާރު ދާއިރާގެ ޢިއްޒަތެރި މެމްބަރެވެ. އުނގޫފާރު އެބޭފުޅަކަށް ފަޚުރުވެރިވާ ދަރިއެކެވެ. ދީނީ ޢިލްމު ވެރިއެއްގެ އިތުރުން ވާހަކަ ދެއްކުމުގެ ހުނަރު ލިބި ވަޑައިގެންވާ ކުޅަދާނަ ވާހަކަ ދެއްކުން ތެރިއެކެވެ. މަޖްލީހުގެ ތަޅުމުގައި ބަހުސްކުރެވޭ ދީނީ މައްސަލަ ތަކުގައި އިސްލާމް ދީނުގެ ހިމާޔަތުގައި މަސައްކަތް ކުރެއްވި ފަހުލަވާނެކެވެ. ދިވެހި ޤައުމު ފަޚްރުވެރިވާ ފަދަ ބަތަލެކެވެ. އެބޭފުޅާގެ މަރާއި ގުޅިގެން އެތައް ބަޔަކު ސޯޝަލް މީޑިއާ ތަކުގަޔާއި ނޫސްތަކުގައި މިފަދަ ބަޔާން ތައް ދެއްވިއެވެ. "މިފަދަ މުހިއްމު މަސައްކަތްތަކެއް ކުރައްވަމުން ވަޑައިގެންނެވި ބޭފުޅަކަށް މިފަދަ އަނިޔާވެރި ހަމަލާއެއްދީ ގަތުލުކުރުމަކީ މުޅި ގައުމަށް ލިބުނު ވަރަށް ބޮޑު ގެއްލުމެކެވެ. މި ބޮޑު ޖަރީމާގެ ފަހަތުގައިވާ މުޖުރިމުން ހޯދައި އެއުރެންނަށް ހައްގު އަދަބު ލިބެންޖެހޭނެ އެވެ،" އިސްލާމިކް މިނިސްޓްރީގެ ބަޔާނުގައިވެ އެވެ. "އަޅުގަނޑުމެންނަށް ގެއްލިގެން އެދިޔައީ އަގުހުރި ދިވެހި އިލްމީ ދަރިއެއް. އެމަރުޙޫމްގެ ފުރާނަފުޅަށް ސުވަރުގޭގެ ދާއިމީ ނިއުމަތް ލެއްވުން އެދި އަޅުގަނޑު ދުއާކުރަން،" ރައްޔިތުން މަޖްލީހުގެ ރައީސް ޝާހިދު ވިދާޅުވި އެވެ.

ނަމަވެސް ޖަވާބު ނުލިބޭ ސުވާލަކީ، އަފްރާޝީމްގެ ޙަޤީޤީ ޤާތިލަކީ ކާކުބާއޭ..؟ ކުރެވޭ ސުވާލެވެ. ވަރަށް ސާފުކޮށް މިސުވާލަށް ޖަވާބު ލިބޭނެއެވެ. އެންމެ ފުރަތަމަ އަފްރާޝީމް ގެންގުޅުއްވި ދީނީ މެދުމިނުގެ ޚިޔާލެވެ. ދީނީ ގޮތުން ޙައްދު ފަހަނަ އަޅާފައިވާ ބަޔަކު (ޑޮޓުން) އަފްރާޝީމަށް ދީފައިވާ އިންޒާރާއި، އަނިޔާއެވެ. އަފްރާޝީމަކީ، ބައެއް ދީނީ އިލްމުވެރިން "އިބިލީހުގެ" ނަމުގައި ސިފަކުރައްވާ ބޭފުޅެކެވެ. އަފްރާޝީމް އަވަހާރަކޮށްލި ރޭ އެ ބޭފުޅާ ގެއަށް ދުރުވީ އެބޭޅުގާގެ ކާރުކޮޅުގައި ގިނިކަންޏާ އެވެ. އެއީ ޓީވީ މޯލްޑިވްސް ގައި އޮތް ދީނީ ޕްރޮގްރާމެއް ގައި ބައިވެރިވެލެއްވުމަށް ފަހު ނިންމާފައި ގެއަށް ވަޑައިންނެވިި ވަގުތެވެ. އެރޭ އެބޭފުޅާ ވަނީ އެތައް ބަޔެއްގެ ކިބައިން މަޢާފަށްވެސް އެދިވަޑައިންފައެވެ.

ދިވެހި ރައްޔިތުންގެ ދީނީ އެއްބައިވަންތަކަމާ ބެހޭ ގާނޫނަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރުކަން ކުރެއްވި ޑރ. އަފްރާޝީމް އަލީ މުހިއްމު އިސްލާހުތަކެއް ހުށަހަޅުއްވާފައިވާ ކަމަށް އިސްލާމިކް މިނިސްޓްރީން ބުންޏެވެ. އަފްރާޝީމް ދިރިއުޅުއްވާ ހ. ފުން ވިލުގައި އެރޭ ދަންވަރު ތޫނު އެއްޗަކުން ހަމަލާދީ އޭނާ އަވަހާރަކޮށްލި މައްސަލަ ކުށްވެރިކޮށް އިސްލާމިކް މިނިސްޓްރީން ނެރުނު ބަޔާނެއްގައި ބުނެފައިވަނީ މަޖިލީހުގައި މިހާރު ތިއްބަވާ މެމްބަރުންގެ ތެރެއިން އަފްރާޝީމަކީ އެންމެ މަތީ ފާސް ނަންގަވައިގެން ހުންނެވި އެއް ބޭފުޅެއް ކަމަށެވެ. އޭނާ އަވަހާރަކޮށްލި އިރު، ދީނީ އެއްބައިވަންތަކަމާ ބެހޭ ގާނޫނަށް އިސްލާހު ގެނައުމަށް ވަރަށް ވަރުގަދަ އިސްލާހުތަކަކާ އެކުގައި ގާނޫނު ހަދާ މަޖިލީހަށް ހުށަހަޅުއްވާފައިވާ ކަމަށް މިނިސްޓްރީން ބުންޏެވެ. އެގޮތުން ފިގުހު އެކަޑަމީ އަށް ގާނޫނީ ބާރުވެރިކަން ލިބިދޭ އިސްލާހާއި ރާއްޖޭގައި އިސްލާމް ދީން ނޫން އެހެން ދީނަކަށް ފުރުސަތު ނުލިބޭ ގޮތަށް ގާނޫނީ ގޮތުން ކަނޑައަޅާ އިސްލާހާއި އެހެން ދީންތަކުގެ އަޅުކަންކުރާ ތަންތަން ރާއްޖޭގައި ބިނާކުރުން ގާނޫނީ ގޮތުން މަނާވާ ގޮތަށް އިސްލާހު ހުށަހަޅާފައިވެ އެވެ.

އަފްރާޝީމް އަވަހާރަކޮށްލުމުގައި ދީނުގެ ނަމުގައި ފިތުނަ ފަސާދަ އުފެއްދުމުގައި އަރާ ތިބި ބަޔަކު ވާނެ ކަމީ އެއްވެސް ޝައްކެތް ނެތް ކަމެކެވެ. މާލޭގެ ފިހާރަތަކުގައި ބަހައްޓާފައި ހުރި ބުދުތަކަށް ބަލާލަމާ ހިނގާށެވެ. އެއަށް އިޙްތިރާމް ކުރުމުގެ ގޮތުން ރީތި ހެދުން އަޅުވާ، މޭކަޕްކޮށް، ރައްކާތެރި ކަމާއި އެކު ބަލަހައްޓައެވެ. އަމިއްލަ ދަރިއަކު ރީތިކޮށް ނަލަކުރާގޮތަށް ނަލަ ކުރެއެވެ. ނަމަވެސް މި ބުދުތަކަށް ގޯނާ އެއް ގެއްލުމެއް ދޭނެ ދީނީ ބަޔަކުނުވެއެވެ. މިއާ ޚިލާފަށް ރާއްޖޭގައި ބުދު ދީނުގެ ފަލްސަފާ ފެތުރިގެން ގޮސްފައިވާ މިންވަރު ހާމަކޮށް ދިނުމަށް ޤައުމީ ދާރުސް އާސާރުގައި ޑިސްޕްލޭ ކުރެވިފައި ހުރި، ހުރިހާ ބުދުތަކެއް، ހަތެއް ފެބްރުއަރީގައި، ދީނަށް ލޯބިކުރާ ބަޔަކު ތަޅާ ސުންނާފަތި ކުރީއެވެ. މިފަދަ ތަރިކައަކީ، އަންނަން އޮތް ޖީލުތަކަށް ފޯރުވައިދޭން ޖެހޭ ތަކެއްޗެވެ. އަޅުގަނޑުމެންގެ ދަރިންނަށް ވިސްނައިދޭން ޖެހޭނީ އަޅުގަނޑުމެންގެ ކުރީގެ ކާބަފައިންނަކީ ކިހާ ނުވިސްނޭ ބަޔެއްކަމެވެ. އަތުން، ހިލައިން ހަދާފައިވާ ބުދުތަކަށް އަޅުކަން ކުރި ބުދުތައް އެކުދިންނަށް ފެންނަން ހުރުމަކީ އަޅުގަނޑުމެންނަށް ދެއްކެން ހުރި ހަމައެކަނި ހެއްކެވެ. ނަމަވެސް އެތަކެތި ހަލާކޮށް މުގުރާލުމުން އެގެއްލުނީ ފެންނަން ހުރި ކިތައް ހެކި ތޯއެވެ. މި ރާއްޖޭގައި ދާރުލް އާސާރުގައި ބަހައްޓާފައި ހުރި އެއްވެސް ބުދަކަށް އަޅުކަން ކުރާތީ ރާއްޖެ އިސްލާމްވީ ފަހުން، އެއްވެސް މީހަކު ނުދެކޭނެއެވެ.

ބައެއް މީހުން އަފްރާޝީމްގެ މަރުގެ ޒިންމާ އަޅުވަނީ ސިޔާސީ ފަރާތްތަކުގެ ބޮލުގައެވެ. ބައެއް ސިޔާސީ ޕާޓި ތަކުގެ އިސްވެރިންގެ ބޮލުގައެވެ. އެއްބަޔަކު، އަފްރާޝީމްގެ އަނބިކަނބަލުންގެ އިސްތަށިފުޅުގައިވެސް މި ތުހުމަތު އަޅުވައެވެ. ދޭތެރެއަކުން ފުލުހުންގެ ފަރާތުން، މި މަރުގެ ތަހުޤީޤަށް ކުރިއެރުން ލިބޭ ވާހަކަ އާއި، ވަރަށް އަވަހަށް މައުލޫމާތު އާންމު ކުރާނެ ކަމަށް ނޫސްވެރިންނަށް ދަންނަވައެވެ. މި މައްސަލާގައި ފުލުހުން ވަނީ ނުކުޅެދިފައިކަން، އަފްރާޝީމް ގެ މަރުގެ ތަހުޤީޤަށް ފަސްލައްކަ ރުފިޔާ ހުށަހަޅާ، އެމެރިކާގެ އެފް.ބީ.އައިގެ ދެ އިންވެސްޓިގޭޓަރުން ގެނައުމުންވެސް އަޅުގަނޑުމެންނަަށް އެނގިއްޖެއެވެ. އަފްރާޝީމްގެ މަރަކީ ސިޔާސީ ގޭމަކަށް ހެދުމަށް އެއްބަޔަކު މަސައްކަތް ކުރަމުންދާއިރު، މިހާތަނަށް ފުލުހުންނަށް ލިބިފައިވާ ގިނަ ގަރީނާތައް ބިނާ ވަނީ އަފްރާޝީމް އަވަހާރަކޮށްލީ ދީނީ ހަރުކަށި ޚިޔާލުގެ ބަޔަކުގެ ރޭވުމެއްގެ ދަށުންނެވެ.

ޑރ. އަފްރާޝީމްގެ މަރުގެ ތަހުގީގުގެ މައުލޫމާތު ފުލުހުން އާއްމުކުރުން ލަސްވަމުންދާތީ އަމާޒު ވެފައިވާ ފާޑުކިޔުންތަކާ ގުޅިގެން ސުވާލުކުރުމުން ކޮމިޝަނަރު ވިދާޅުވީ އެ މަރުގެ މައްސަލައިގެ ތަހުގީގާ ބެހޭ މައުލޫމާތު އާއްމުކުރާނީ އެ ހިސާބަށް ދެވިއްޖެ ކަމުގެ ޔަގީންކަމާ އެކުގައި ކަމަށެވެ. އެ މައުލޫމާތު އާއްމުކުރާނީ ފުލުހުން އެކަމަށް ތައްޔާރުވުމުން ކަމަށް ވެސް ކޮމިޝަނަރު ވިދާޅުވި އެވެ. ރިޔާޒު ވިދާޅުވީ އެއީ ވަރަށް ބޮޑު މައްސަލައެއް ކަމަށާއި ބަލަން ޖެހޭ ބެލުންތަކާއި ޔަގީންކުރަން ޖެހޭ ޔަގީންކުރުންތަކެއް އެބަހުރި ކަމަށެވެ.  ރިޔާޒު ވިދާޅުވެފައި ވަނީ ތަހުގީގާ ގުޅޭ ގޮތުން ފުލުހުން އާއްމުކުރާ މައުލޫމާތުތަކުގައި ސިޔާސީ އެއްވެސް ނުފޫޒެއް އެކުލެވިގެން ނުވާނެ ކަމުގެ ޔަގީންކަން ރައްޔިތުންނަށް ދެއްވާ ކަމަށެވެ. ކޮމިޝަނަރު ގެ މި ޢިބާރާތްވެސް، އަފްރާޝީމްގެ މަރުގެ ފަހަތުގައި ތިބި ބަޔަކީ، ދީނީ ހަރުކަށި ޚިޔާލުގެ (ޑޮޓުންގެ) ބަޔެއްކަން ވަރަށް ސާފުކޮށް މިއޮތީ ދޭހަވާށެވެ. މީހަކު ބުނާ އެއްޗެއްގެ މާނަ ރަގަނޅަށް ދޭހަ ނުވާ ކިތައް ކިތައް މީހުން މި ރާއްޖޭގައި ތިބޭނެ ބާއޭ ހިތަށް އަރައެވެ. (ނައިފަރު އަޕްޑޭޓް ނިއުސްޓީމް) ނދމ

(މިއީ ކިޔުންތެރިއަކު ފޮނުއްވެވި ލިޔުމެކެވެ. މިލިޔުމުގައި ވާ އެއްވެސް އެއްޗަކަށް އުނި އިތުރެއް ގެނެވިފައެއް ނުވާނެއެވެ.)

އިތުރަށް.. »

ހަންދަރު ކިރޭނީ މަހުންނަ...

ދުވަސް ވަރަކީ ދެވަނަ ބޮޑު ހަނގުރާމައިގެ އެންމެ ތަދު ދުވަސްވަރެވެ. ކޮންމެ ރަށެއްގައި "ކ.ހ" އޮފީހެއް (ކާޑު ހަވާލުކުރާ އޮފީހެއް) ހުރެއެވެ. ރަށުގެ ދޯނިފަހަރުން ބާނާ މަހުންވެސް ވަކި އަދަދެއް ކ.ހ އޮފީހަށް ނެގެމުން ދެއެވެ. ނައިފަރަކީ އަތޮޅުގެ ވެރިކަން ކުރާ ރަށަށް ވާތީ އަތޮޅުގެ އެހެން ރަށްތަކަށް ގެންނަ ކާޑުގެ ބާވަތްތަށް (ހަނޑޫ، ހަކުރު، ފުށް، ޒުވާރި ފަދަ ތަކެތި) ޖައްރާފު ބޯޓްގައި ގެނެސް ހަވާލު ކުރަނީ ނައިފަރު އޮފީހާއެވެ. އޭރު ނައިފަރުގެ އާބާދީއަކީ ގާތްގަނޑަކަށް 500 މީހުންނެވެ. ރަށުގައި ސިއްޙީ މަރުކަޒެއްގެ އިތުރުން މަދްރަސަތުލް އިފްތިތާހް ނަމަކަށް ކިޔާ މަދްރަސާއެއް ވެސް ހުރެއެވެ. މިއީ މާލެ ފިޔަވާ ރާއްޖެތެރޭގައި އުފެއްދި ފުރަތަމަ މަދުރަސާވެސް މެއެވެ.

ނައިފަރަކީ އެވޭލާ ޒަމާނުއްސުރެ މަސްވެރިން ގިނަ ރަށެކެވެ. މަސްވެރި އުލަނދު ފަހަރު ގިނަ ރަށެކެވެ. މަސްވެރިކަމުގައި އަތޮޅުގެ އެންމެ ކުރީގައި އުޅެނީ ނައިފަރޭ ބުނުމަކީ ބޭއިންސާފެއް ނޫނެވެ. ހެނދުނު ބޮޑު ފަތިހާ ރަށުގެ ދޯނިތައް މަހަށް ފުރައިގެން ދިޔުމަށް ފަހު، ހަވީރު އިރު އޮއްސުމުގެ ކުރިން ބޭނި މަސްކޮޅު ހިފައިގެން ރަށަށް ލަފާއިރު، މަސްކެއްކުމާއި މަސްދޮވެ ސާފުކުރުމަށް އަންހެން ވެރިން ތިބޭނީ ތައްޔާރުވެގެންނެވެ. ހައްސަ ބާނައިގެން އަންނަ ގިނަ ދޯނި ފަހަރު މަސްބާނާތަން ރަށުގެ ތުނޑީމަގަށް ފެންނާނެއެވެ. ސަބަބަކީ އޭރު މަސްވެރިން ބޭނުން ކުރަމުން ދަނީ ރިޔާ ދޯނި ކަމަށް ވެފައި، ދޯނި ފަހަރު އެންމެ ދުރަށް ވެސް ދާނީ ޅ. އަތޮޅު ކަނިފުށްޓާއި ހަމައަށެވެ. އެއީ ކަނިފުށީ ކޮޅުން މަސްބޭނި ޒަމާނެވެ.

ނައިފަރު ގައި ދުއްވާ "ގަހާ" ކިޔާ ދޯންޏަކުން މަސްބާނަން ނިކުމެ އުޅެނިކޮށް ދިމާވި ހާދިސާއެކެވެ. އެއީ އިރުވައި މޫސުމްގެ ހަޅަޖަހާ ދުވަސްވަރެވެ. ހަވީރު ވަގުތެއްގައި ހަތަރު އުދަރެސް ބައްދާލާފައި ހެދި ބޮޑު ވިލާ އެކެވެ. އޭރު ދޯނި އޮތީ ކަނިފުށީ މުއްޔާއި ދިމާ ބޭރުގައި މަސްބާނާށެވެ. އެންމެ ފަލަ މާރުގަނޑުގައި (އެންމެ ފަލަ ކުރު ދޮށީގައި ދަހިކޮށް މަސްބޭނުން) 3 ކިލޯ 4 ކިލޯ ވަރުގެ ފަލަ ގޮދާ ބާނަމުން ދަނިކޮށް، އައިނަށް އެރި ހިންނަވަރު ދޯންޏެކެވެ. ހިންނަވަރު ދޯނި އައިނަށް އަރަން ވާއިރަށް ގަހާ ދޯނިން ހަތަރު ވަތް ފުރާ ދޯނި މަހުން ބަރާކޮށްލައިފިއެވެ. އިތުރަށް ދޯނީގައި ތަން ނެތުމުން އެންކޮޅު ކަވާފައި (އެންކޮޅު މަސްތަށް ކެއުމަށް މަސް އައިނަށް އޮއްސާލުމަށް ފަހު) ހަތަރު އުދަރެސް ބައްދާލާފައި ހަދަމުން ދިޔަ ވިލާގެ ކުރިއަށް ރަށަށް ދެވޭތޯ ދީލާލީއެވެ. އަދި ހިންނަވަރު ދޯންޏާއި ކައިރި ކޮށްލާފައި ނަގަމުން ދާ ބޮޑު ވިލާ ދައްކާލުމަށް ފަހު "ގަހާ" ދޯނީގެ ކެޔޮޅު ހިންނަވަރު ދޯނީގެ ކެޔޮޅާއި މުޚާތަބުކޮށް އަވަހަށް ރަށާއި ދިމާއަށް ދޯނި އަނބުރާ ލުމަށް ވެސް ނަސޭހަތް ދިނެވެ. ނަމަވެސް އެ ދޯނީގައި ތިބި ގޮތްދޫނުކުރާ މީހުންގެ ޖަވާބަކީ "ހަންދަރު ކިރޭނީ ވިލާއަކުން ނޫނޭނަ... ހަންދަރު ކިރޭނީ މަހުންނަ.." އޭ ކިޔާ މަސްބާނަން ތިބީއެވެ.

"ގަހާ" ދޯނި ވޭވަށު މުއްޔާ އަރާ ހަމަ ނުވަނީސް ވިލާ ގަނޑު ޖެހިއްޖެއެވެ. ސަލާމަތުން ރަށަށް އާދެވުނީ ހަމަ ކިރިޔާއެވެ. ހިންނަވަރު ދޯނި ވިލާގަނޑުގެ ވަޔާއެކު ދިޔަ ތަނެއްވެސް އަދި އަދަށް ދާންވެސް އެނގޭ މީހަކު ނުވެއެވެ. ވިލާ ގަނޑާއެކު ދޯނި ބަންޑުން ޖަހާލީ ކަމެއް ވެސް ނޭގެނއެވެ. ބުނާ މީހަކަށް ނުބަލައި، ބުނާ ބަހަކަށް ބެލި ނަމަ އެމީހުންނަށްވެސް ސަލާމަތުން ރަށަށް އާދެވޭނެކަން ޔަޤީނެވެ. އެފަހުން މިސާލު ބަހެއްގެ ގޮތުގައި މިބަސް ބޭނުން ކުރެއެވެ. "ހަންދަރު ކިރޭނީ ވިލާއަކުން ނޫނެވެ. ހަންދަރު ކިރޭނީ މަހުންނެވެ." މިބަސް އާންމުކޮށް ބޭނުން ކުރަމުން ދިޔައީ ނަސޭހަތެއްގެ ގޮތުން ދުރާލާ ރައްކާތެރި ވުމަށް ބުނެ އުޅޭ ބަހެއްގެ ގޮތުގައެވެ. (ނައިފަރު އަޕްޑޭޓް ނިއުސްޓީމް) މލކ

އިތުރަށް.. »

ތާރީޚް: ބޯކުޑަ ވާހަކަ

ޅ. ނައިފަރަކީ ޒަމާނުއްސުރެ މަސްވެރި ރަށެކެވެ. މަސްވެރިކަމުގައި އަތޮޅުގެ އެންމެ ކުރީގައި އުޅެނީ ނައިފަރޭ ބުނުމަކީ ބޭއިންސާފެއް ނޫނެވެ. ހެނދުނު ބޮޑު ފަތިހާ ރަށުގެ ދޯނިތައް މަހަށް ފުރައިގެން ދިޔުމަށް ފަހު، ހަވީރު އިރު އޮއްސުމުގެ ކުރިން ބޭނި މަސްކޮޅު ހިފައިގެން ރަށަށް ލަފާއިރު، މަސްކެއްކުމާއި މަސްދޮވެ ސާފުކުރުމަށް އަންހެން ވެރިން ތިބޭނީ ތައްޔާރުވެގެންނެވެ. ހައްސަ ބާނައިގެން އަންނަ ގިނަ ދޯނި ފަހަރު މަސްބާނާތަން ރަށުގެ ތުނޑީމަގަށް ފެންނާނެއެވެ. ސަބަބަކީ އޭރު މަސްވެރިން ބޭނުން ކުރަމުން ދަނީ ރިޔާ ދޯނި ކަމަށް ވެފައި، ދޯނި ފަހަރު އެންމެ ދުރަށް ވެސް ދާނީ ޅ. އަތޮޅު ކަނިފުށްޓާއި ހަމައަށެވެ. އެއީ ކަނިފުށީ ކޮޅުން މަސްބޭނި ޒަމާނެވެ.

މަސްބާނައިގެން އަނބުރާ ހޭރިޔާ ކުރަމުން، ރަށަށް ލަފާއިރު ރަށުގެ ކުޑަކުދިން ތިބޭނީ އަތިރި މަތީ އެކުދިންގެ ބަފައިންގެ އިންތިޒާރުގައެވެ. ރަށުގެ ގިނަ މީހުން މަސްކައްކައިގެން ރިހާކުރަށް ހަދާ ކައިރި ރަށް ރަށަށާއި މާލެ އަށް ވިއްކަން ފޮނުވައެވެ. ނައިފަރު މަދުގަސްދޮށުގެ މިހާރު ހުންނަ ހިސާބުގައި އޭރު ބޮޑު ނިކަބިލިއްސަ (ނިކަ) ގަހެއް ހުރެއެވެ. އެހިސާބަކީ އޭރުގެ އަތިރި މަތީ ހިސާބު ކަމަށް ވާތީ ގަސް ގިނަ ސަރަހައްދެކެވެ. އެތަނުގައި ހުންނަ ނިކަބިލިއްސަ ގަހުގެ އެތެރެ ފަރާތުން ވަލު ތެރޭ ވީ ހިސާބުގައި އިންނަ ހޮހޮޅައެއް ކަހަލަ ތަނެއްގައި "ބޯ ކުޑަ" ނަމަކަށް ކިޔާ އަންހެނަކު އުޅެއެވެ. މި އަންހެން މީހާގެ ބޯ، އެންމެ ވައްތަރުވާނީ ކަށިކެޔޮ ގަނޑެއްގެ ސިފަ އާއި ނުވަތަ ދޮންކެޔޮ ގަހެއްގެ ބޯއްޓަކާ އެވެ. ބައެއް މީހުން މި އަންހެނާ ދެކެ ފިސާރި ބިރުވެސް ގަންނަ ކަމަށް ވެއެވެ.

ބޯކުޑަ އަކީ ނައިފަރު މީހަކަށް ލިބުނު ދަރިއެއް ކަމުގައި ވެސް ބުނެ އުޅެއެވެ. ބޯކުޑަ އަށް އަސްލު ކިޔަނީ އާމިނާ އެކެވެ. ވާހަކަ ދެއްކުމުގައި ކޮށި ކަމެއް ހުންނަ ބޯކުޑަ އަކީ މީހުންނަށް ވަރަށް ފަސޭހަ ކޮށްދޭ މީހެކެވެ. ދޯނިފަހަރުން ގެންނަ މަސް ކައްކާ ނުނިމެންޏާ މަސްކައްކަން އެހީތެރި ވެދެއެވެ. އާދައިގެ މީހަކަށް ނުކުރެވޭހާ ހަލުވިކޮށް ބޯކުޑަ މަސައްކަތް ކުރެއެވެ. ބޯކުޑަ ބަދިގެއަށް ވަންނަމުން ގޭގެ އަންހެން ވެރިންނަށް ބުނެއެވެ. "ހާނަ މަސްކައްކަންޏާ، ބަދިގެ އަށް ވަދެގެން ނުވާނެ.." އެވެ. ނަމަވެސް ބައެއް މީހުން ބޯކުޑަ ކުރާ ކަންތަކަށް ފާރަވެސް ލައެވެ. ފާރަލަނިކޮށް ބޯކުޑައަށް ފެނިއްޖެއްޔާ ދެން އެގެއަށް މަސްކައްކައިދޭކަށް ނާދެއެވެ. ކިތަންމެ ބައިވަރު މަހެއް ކައްކަން ހުއްޓަސް ފަޖުރު ލުމުގެ ކުރިން މަސްކައްކާ ނިންމާ، ތޮށެލި ދޮވެ ހުރިހާ ކަމެއް ނިންމާނެއެވެ.

ބޯކުޑައަށް ފާރަލީ މީހަކަށް ފެނުން ހަޤީޤީ ހާދިސާއެއް ހިއްސާ ކޮށްލާނަމެވެ. މަރީދައިތަ އަކީ މަސްވެރި ފިރިހެނެއްގެ އަނތްބެކެވެ. ހަވީރު މަހުން ލެފި ދޯނިން ގެނައި މަސް ކައްކަން ތޮށެލި މަތީ އަތުރާ، މަސްކަނޑާ ހަދައިގެން ކައްކަން ތައްޔާރަށް ހުއްޓާ މަރީދައިތަގެ އެންމެ ކުޑަ ސޮރު ހޭލައިގެން ރޯތީ މަސްކައްކަން އުނދުންމައްޗަށް ފެން އުދާފާ، ކުޑަސޮރަށް ބުއްދީ ނިންދަވަން އުނދޯލީގައި އިންދާ ބޯކުޑަ އަތުވެއްޖެއެވެ. ބޯކުޑަ ބަދިގެ ކައިރިއަށް އަރާ ހަމަވެފައި "ހާނަ މަސްކައްކާ ހަދަނީ.." މިހެން ބުންޏެވެ. މަރީދައިތަ ކުޑަސޮރު ނިދީމާ، ބަދިގެއަށް ވަންނަން ދިޔައިރު ފުރަތަމަވެސް ފެނުނު މަންޒަރުން ބިރުން ގަޔަށް ފަހަރުވަ ލެވިއްޖެއެވެ. ބޯ ކުޑަ އިނީ އުނދުނަށް ދެފައި ކޮށްޕައިގެން މަސްކައްކާށެވެ. ހީވަނީ ގޭސް އުނދުނަކުން އެންމެ ބާރު ސްޕީޑްގައި ގޭސްދޫކޮށްލާފަ ހުރުމުން އަލިފާންގަނޑު ވަށައިގެން ހިފައިފާ ހުރިހެންނެވެ. މަރީދައިތަ ގަންނާ ކުރެއްވި ބިރުން އަވަހަށް ގެއަށް ވަނީ އެވެ. ދަންވަރު 1 ނުޖަހަނީސް ބޯކުޑަ މަސްކައްކާ ނިންމާ، ތަންސާފުކޮށް ގެއަށް ދަމުން "ހާނަ މިގެންދަނީ، ބޮލު ބަނޑައި ފޮއްޗެކެ.." ބުންޏެވެ.

ކިތަންމެ ބައިވަރު މަހެއް ކައްކައި ދިނަސް ބޯކުޑަ ގެންދާނީ، ބަނޑައިދުލަކާއި، މަހުގެ ބޮލަކާއި، ކަށިފޮއްޗެކެވެ. އެއީ ބޯކުޑަ ކެއުމަށާއި  އޭނާ ގެންގުޅޭ ކުދި ފިޔޮއް ތަކަށް ކާންދޭށެވެ. ބޯކުޑަ އަކީ އަވަށްޓެއްސެއް ކަމަށްވެސް މީހުން ސިފަކުރެއެވެ. ބޯކުޑަ ދުވާލުގެ ވަގުތު ތަކުގައި ބޭރަކަށް ނުނިކުމެއެވެ. ސަބަބަކީ އޭނާގެ ސިފަ ފެނި މީހުން ބިރުގަންނާތީ ކަމަށް ވެސް ވެދާނެއެވެ. (ނައިފަރު އަޕްޑޭޓް ނިއުސްޓީމް) ކޑޒ

އިތުރަށް.. »

ޙަޤީޤީ ޤާތިލަކީ އޭނާގެ ފިރިމީހާ...

އޭނާ މަރާލާފައިވަނީ، ވަރަށް ވެސް އަނިޔާވެރި ގޮތަކަށެވެ. އޭނާގެ މޫނުބެލި މީހަކު، އެފަދަ އަނިޔާވެރި މަރަކުން މަރާލާފައިވާ މީހަކު ދުވަހަކުވެސް ދުށް ކަމަކަށް ނުވެ އެވެ. އޭނާ މަރަށް ހާޒިރުވެފައި އޮއްވައި ފެނުނީ ލޭ ކޯރެއްގެ ތެރެއިންނެވެ. އޭނާގެ ބޯ ވަނީ ޗިސްޗިސްކޮށްލާފަ އެވެ. ހަށިގަނޑުގެ އެތައް ތަނަކަށް ވަނީ ބޮޑެތި އަނިޔާތަކެއް ކޮށްފަ އެވެ. އޭނާގެ މަރުގެ ހާދިސާ ބައިނަލްއަޤުވާމީ މުޖުތަމަޢުން ވެސް ވަރަށް ބޮޑަށް ކުށްވެރިކުރި އެވެ.

ޝައިމާ އަކީ ޢިރާޤުގެ ރައްޔިތެކެވެ. އޭނާ އެމެރިކާއަށް ދިޔައީ، ރެފިއުޖީއެއްގެ ގޮތުގަ އެވެ. އޭނާގެ މަރުގެ ޙަޤީޤަތް ބުނެދޭ ވާހަކަ، މީޑިއާގައި ފެތުރިފައިވަނީ މިދަންނަވާ ގޮތަށެވެ.

ޝައިމާގެ ޤާތިލު، އޭނާގެ ގެއަށް ވަދެފައިވަނީ ބިތްދޮށްފަރާތުގައިވާ ބަގީޗާގެ ތެރެއިން ލާފައި ގޮސް ބަދިގޭ ކުޑަދޮރުންނެވެ. އެ ކުޑަދޮރުގެ ބިއްލޫރިގަނޑު ތަޅާލި އަޑު އެއްވެސް މީހަކަށް އިވިފައެއް ނުވެ އެވެ. ބިއްލޫރިގަނޑު ތަޅާލުމަށްފަހު، ކުޑަދޮރުގެ ތަންޑު ނައްޓާލައިގެން ކުޑަދޮރު ހުޅުވި އެވެ. ދެން އެ ކުޑަދޮރުން ގޭތެރެއަށް ވަނެވެ. އޭރު ޝައިމާ އިނީ، ކާކޮޓަރި ތެރޭގަ އެވެ. ޤާތިލު، ޝައިމާއަށް ޙަމަލަދީފައިވަނީ، ފަހަތުންނެވެ. ޝައިމާގެ ބޮލަށާއި ހަށިގަނޑުގެ އެހެނިހެން މަރުވަޅުތަކަށް ޤާތިލު ޙަމަލަދީފައިވަނީ ދަނގަޑުބުރިއަކުންނެވެ. ހޭނެތެންދެން ޝައިމާގެ ގައިގައި ތަޅައި އަނިޔާކުރުމަށްފަހު، ޤާތިލު ހިނގައްޖެ އެވެ. އޭގެ ކުޑައިރުކޮޅެއް ފަހުން، ޝައިމާގެ ދޮށީ އަންހެން ދަރިފުޅު ފާޠިމާ، މަތީ ބުރިން ތިރީ ބުރިއަށް ފޭބިއިރު، މަންމަ ލޭކޯރެއްގެ ތެރޭގައި ހޭނެތިފައި އޮއްވައި ފެނުނެވެ. ޝައިމާގެ ކައިރީގައި ބާއްވާފައިވާ ކަރުދާސްގަނޑެއްގައި ބޮޑު އަކުރުން ލިޔެފައިވެ އެވެ. "ޓެރަރިސްޓު އަންހެނާ އެވެ! އަވަހަށް ތިބާގެ ގައުމަށް ދާށެވެ!" އޭރު ފާޠިމާގެ ބައްޕަ، އަދި ޝައިމާގެ ފިރިމީހާ ވަނީ، އެ ދެ މަފިރިންގެ އަނެއް ހަތަރު ކުދިން ސްކޫލަށް ލުމަށްޓަކައި ގެއިން ބޭރަށް ގޮހެވެ. އެސާހިތަކު ޝައިމާ، ހޮސްޕިޓަލަށް ގެންދެވުނެވެ. އެއަށްފަހު ތިން ދުވަސް ވީއިރު، އޭނާގެ ހަށިގަނޑާ ފުރާނަ ވަކިވެއްޖެ އެވެ.

މި ހާދިސާއާ ވިދިގެން އެންމެން ވެސް ހީކުރީ ޝައިމާ ގެ ޤާތިލަކީ، ޢަރަބީންނާއި މުސްލިމުން ދެކެ ރުޅިއަންނަ ޣައިރު މުސްލިމެއް ކަމަށެވެ. ޝައިމާގެ ގާތްތިމާގެ މީހުންނާއި، އެކުވެރިންނާއި، އޭނާގެ ފިރިމީހާ ވެސް ބުނަމުން ގެންދިޔައީ އެގޮތަށެވެ. ޔޫރަޕާއި އެމެރިކާގައި، މުސްލިމުންނަށް ނަފުރަތުކުރާ ޣައިރު މުސްލިމުން ވަރަށް ގިނަ އެވެ. އެހެންކަމުން، ޝައިމާ ގެ ޤާތިލަކީ، އެފަދަ ޣައިރު މުސްލިމެއް ކަމަށް ބުނުމުން، އެވާހަކަ އެއްވެސް ޝައްކަކާ ނުލައި އާންމުންނަށް ހަޖަމުކުރެވިދާނެތާ އެވެ! އަދި ޝައިމާގެ ކައިރީގައި ބާއްވާފައިވާ މެސެޖަކީ ވެސް، އެ ޖަރީމާ ހިންގި މީހާގެ ޝަޚުޞިއްޔަތު ހާމަކޮށްދޭ ހެތްކެއް ކަމުގައި ވޭތާ އެވެ! އޭގައި އެވަނީ، ޝައިމާ އަކީ ޓެރަރިސްޓެއް ކަމަށް ބުނެފަ އެވެ! އަދި ޝައިމާގެ އުފަން ގައުމު ކަމަށްވާ ޢިރާޤަށް އެނބުރި ދިއުމަށް ވެސް އިންޒާރުކޮށްފަ އެވެ!

ބޮޑެތި ޖަރީމާތަކުގެ ޙަޤީޤަތުގެ މައްޗަށް ފަސް އަޅައި ފޮރުވާލުމަށްޓަކައި، އާންމުންނަށް ހަޖަމުކުރެވޭނެހެން ވާހަކަތައް ހަދަހަދައިގެން ދެއްކުމަކީ މިދުނިޔޭގައި އާކަމެއް ނޫނެވެ. ޝައިމާގެ މަރުގެ ހާދިސާ ބުނެދޭ ވާހަކަ އާންމުންނަށް ހަޖަމުކުރެވުނަސް، އެވާހަކައިގައި ފޫނުބެދޭ ކަންތައްތަކެއް ވެ އެވެ. އެ ވާހަކައިގައި ވާ، ގޮތް ނޭނގޭ ޤާތިލު، ބަދިގޭ ކުޑަ ދޮރުގެ ބިއްލޫރިގަނޑު ތަޅާލި އަޑު އެއްވެސް މީހަކަށް އިވިފައެއް ނުވެ އެވެ! އެ ޤާތިލު، އެ ގެއަށް ވަންނަން ދިޔަ މަންޒަރު ދުށް މީހެއް، ނުވަތަ އެ މަންޒަރު އެރި ކެމެރާއެއް ވެސް ނެތެވެ! އެ ޤާތިލު، ޝައިމާގެ ގައިގައި ދަގަނޑުބުރިއަކުން ތަޅައި، މަރަށް ހާޒިރުވަންދެން އަނިޔާކުރިއިރު، ތެޅި އަޑު، ނުވަތަ ޝައިމާ ހަޅޭލެވި އަޑު އިވުނު މީހަކު ވެސް ނެތެވެ! އޭރު އެގޭ މަތީ ބުރީގައިވާ ކޮޓަރިއެއްގައި އިން، އުމުރުން 17 އަހަރުވީ އަންހެން ދަރިފުޅަށް ވެސް އެއިން އަޑެއް ނީވެ އެވެ! އަދި ގޭތެރޭގައި އެފަދަ ބޮޑު ޖަރީމާއެއް ހިނގާ ކަމުގެ ހިލަމެއް ވެސް ނުވެ އެވެ!!!

ޝައިމާއަކީ، އުމުރުން 32 އަހަރުގެ މަންމަ އެކެވެ. އޭނާއަށް ފަސް ކުދިން ލިބިފައިވެ އެވެ. އެއީ، އުމުރުން 17 އަހަރުގެ ފާޠިމާ އާއި، 16 އަހަރުގެ މުޙައްމަދާއި، 13 އަހަރުގެ ޢަލީ އާއި، 12 އަހަރުގެ މަރްޔަމާއި، 8 އަހަރުގެ ސާރާ އެވެ. މި ފަސްކުދިންގެ ބައްޕައަކީ، އޭނާގެ ފިރިމީހާ ކަމަށްވާ އުމުރުން 42 އަހަރުގެ ޤާސިމެވެ. ޝައިމާ މަރުވުމުން އެކަމަށްޓަކައި އެންމެ ބޮޑަށް ހިތާމަފާޅުކޮށް، އެންމެ ގިނައިން ރުއި މީހަކީ ވެސް ހަމަ އެ ޤާސިމެވެ.

ޝައިމާގެ މަރުގެ ޖަރީމާއަށްފަހު، އެ ޖަރީމާގެ ޙަޤީޤަތް ހޯދުމަށްޓަކައި އެމެރިކާގެ ފުލުހުން މަސައްކަތްކުރަމުން ގެންދިޔަ އެވެ. މީޑިއާގައި އާންމުވި ވާހަކަ ތަޙުޤީޤުކޮށް ބެލިއިރު، އޭގައި އެއްވެސް އޮށްޓަރެއް ނެތް ކަން އެނގުނެވެ! އެހެންކަމުން އެ ވާހަކައިގައި ވާ ޤާތިލު ނޫން އެހެން ޤާތިލަކު ވޭތޯ ބެލުމަށްޓަކައި ފުލުހުން ތަޙުޤީޤުކުރަން ފެށި އެވެ. ޙަޤީޤަތާ ހަމައަށް ވާޞިލުވުމަށްޓަކައި ފުލުހުންގެ ކުރިމަތީގައި ހުޅުވުނު ދޮރަކީ، ޝައިމާގެ ކާރުން ފެނުނު ލިއުމެކެވެ. އެ ލިއުމުން އެނގުނު ގޮތުގައި، ޝައިމާއާއި އޭނާގެ ފިރިމީހާއާ ދެމެދުގައި ވަނީ ގުޅުން ގޯސްވެފަ އެވެ. ޝައިމާ ބޭނުންވަނީ، އެމެރިކާގެ އެހެން ސްޓޭޓެއްގައި ދިރިއުޅޭ އޭނާގެ މަންމަގެ ގާތަށް ދިއުމަށެވެ. ފިރިމީހާ ޤާސިމު ބޭނުންވަނީ ޝައިމާ ދިޔަނުދީ ހިފެހެއްޓުމަށެވެ. މި މައްސަލާގައި އެ ދެމަފިރިން ވަނީ ވަރިފަށަށް އަރާފަ އެވެ. ޝައިމާ ބޭނުންވަނީ ވަރިވެގެން ވެސް އޭނާގެ މަންމަގެ ގާތަސް ދިއުމަށެވެ. އެކަން ވިޔަ ނުދިނުމަށްޓަކައި ޤާސިމު ވަނީ ދޭތިން އެކައްޗަށް ފައިވިއްދާލާފަ އެވެ!

މެދުކެނޑުމެއްނެތި ހަތް މަސް ދުވަސް ވަންދެން ފުލުހުން ކުރި ތަޙުޤީޤުތަކުން އެނގުނު ގޮތުގައި، ޝައިމާގެ ޙަޤީޤީ ޤާތިލަކީ، އޭނާގެ ފިރިމީހާ، ޤާސިމު ފިޔަވައި އެހެން މީހެއް ނޫނެވެ. އޭނާ ފާޅުކުރި ހިތާމައާއި، އޭނާގެ ލޮލުން އޮހޮރި ކަރުނައަކީ، ޙަޤީޤަތް އޮޅުވާލުމަށްޓަކައި ދެއްކި ދަޅަތަކެއް މެނުވީ ނުވެ އެވެ!

ގފރ (ނައިފަރު އަޕްޑޭޓް ނިއުސްޓީމް)

އިތުރަށް.. »