ވަލީ ދޭނީ ހެއްޔެވެ.. ނޫނީ ވަލީ ނުދޭނީ ހެއްޔެވެ..؟

މިއީ މީގެ ފަންސާހަކަށް އަހަރު ކުރީގެ ޙާދިޘާ އެކެވެ.  ނައިފަރުގެ މަޝްހޫރު ބޮޑު ބޭފުޅެއްގެ ދަރިއަކާ ހިތާވި ނިކަމެއްޗެއްގެ ވާހަކަ އެވެ. މަދްރަސީ ދައުރުއްސުރެ ވަރަށް ލޯބިން ހިތާވެގެން އުޅުން ދެ ލޯބިވެރިންނެވެ. ދެމީހުންވެސް އާއިލާގެ މީހުންނަަށް ވަގަށް ގުޅުން ބާއްވަމުން ދެއެވެ. ބައްދަލު ކުރަން ދަނީ މަޝްހޫރު "ގުއިފާރު" ދިމާ ފުނަ ދަނޑަށެވެ. ކުރީ ޒަމާނުގައި ނައިފަރުގެ އަންހެން ވެރިންނާއި ފިރިހެން ވެރިން ޤަޟާ ޙާޖަތް ކުރަން ދަނީ އަތިރި މައްޗަށެވެ. އެޒަމާނަކީ ފާޚާނާ ހުންނަ ޒަމާނަކަށް ނުވާތީ، އަންހެނުންނާއި ފިރިހެނުން އައުރަ ފެނިދާނެތީ އިން ވަކި ކުރުމަށް އެތަނުގައި އުސްފާރެއް ރާނާފައި ހުރެެއެވެ.

ދެމީހުން ރަށްޓެހިވެގެން އުޅޭކަން މީހެއްގެ ފުށުން، އަންހެން މީހާގެ ބައްޕައަށް ޚަބަރު ލިބުނެވެ. އެހާ ހިސާބުން، ބައްދަލު ކުރުމުގައި ދެމީހުންނަށް ވަރަށް ބޮޑަށް އުނދަގޫ ތަކާއި ކުރިމަަތި ލާން ޖެހުނެވެ. އަންހެން މީހާގެ ބައްޕަގެ ފަރާތުން ފިއްތުންތައް ކުރިމަތިވިއެވެ. ކަން މިހެން އޮތް ކަމުގައި ވިޔަސް، ލޯބީގައި ލައިލާ އާއި މަޖުނޫނު ފަދަ މި ދެލޯބިވެރިން، ކޮންމެސް ގޮތަކުން ކަޓުޖައްސާ ކޮންމެސް ތާކުން ބައްދަލުކުރެއެވެ. އަންހެން މީހާގެ ބައްޕައަކީ މިސްކިތުގެ މުދިމު ނެތިއްޖެނަމަ މިސްކިތުގައި ބަންގި ގޮވާ ނަމާދު ކުރާ މީހެކެވެ. މިސްކިތުގެ މުދިމަށް ބޭރަށް ހިންގުމުގެ ރޯގާއެއް ޖެހުމުގެ ސަބަބުން،  ވަގުތީގޮތުން މިސްކިތާ ހަވާލުވެ ނަމާދު ކުރަނީ އަންހެން މީހާގެ ބައްޕައެވެ.

ރެއަކީ ވަރަަށް އަނދިރި ވިއްސާރަ ރެއެކެވެ. ދަމު ނަމާދު ކޮށްލުމަށާއި ޤުރުއާން ކިޔަވާލުމަށް، ކޮންމެ ރެއަކުވެސް އަންހެން މީހާގެ ބައްޕަ ތަންކޮޅެއް ކުރިން މިސްކިތަށް ދެއެވެ. ފަތިސްނަމާދަށް ދިޔުމަށް އަންހެން މީހާގެ ބައްޕަ ނިކުމޭތޯ ފާރަލުމަށް ފިރިހެން މީހާ ހުރީ ބޮލަށް ގޯންޏެއް އަރުވާ (ހިތުން ފުރޭތަ އެއްގެ ސިފައިގަ) މުޅިގައިގަ ފަންގަނޑެއް އޮޅައިގެންނެވެ. އެޒަމާނުގެ މީހުން ޚިޔާލީ ދެވީގެ އިތުރުން ފުރޭތަ އެއްޗެހި އުޅޭކަމަށް ޤަބޫލު ކުރެއެވެ. އެހެން ކަމުން ދަންވަރު 12 ގެ ފަހުން ފަތިސް ނަމާދަށް ބަންގި ނުދޭނީސް ގެއަކުން މީހަކު މަގުމައްޗަކަށް ނުނިކުންނާނެއެވެ. މަގުމަތީ ދިރޭ ފަންޏެއް ހާ ހިސާބުވެސް ފެންނާކަށް ނެތެވެ. އަންހެން މީހާގެ ބައްޕަ ގެއިން ނިކުމެ ހިސާބަކަށް ދިޔަ ތަނާ ބިރުވެރި އަޑެއް ލައްވަމުން، އަންހެން މީހާގެ ބައްޕަގެ ގައިގަ ބަގުޑި ލާ ބައްދައިފިއެވެ.

އަންހެން މީހާގެ ބައްޕަ ބިރުން ގަޔަށް ފަހަރުވަ ލެވިއްޖެއެވެ. މި ފުރޭތަ ބިރުވެރި އަޑަކުން، ސީދާ ދިވެހިބަހުން ސުވާލުކުރަން ފެށިއެވެ.

ފުރޭތަ: ތިޔައީ، މިވެނި މީހާގެ ބައްޕަހޭ..؟

އަންހެން ކުއްޖާގެ ބައްޕަ: އާނއެކޭ.. މީ އެމަންޖެ ބައްޕައޭ، އަހަރެން ދޫކޮށްލާށޭ...

ފުރޭތަ: ނޫނޭ.. މިއަދު ކަލެޔެއް ދުލެއް ނުކުރާނަމޭ... ކަލޭގެޔާ ހުރެ މަށަށް ކަނޑުގައިވެސް ނޯވެވެޔޭ...

އަންހެން ކުއްޖާގެ ބައްޕަ: ތީ ކާކުހޭ..؟ މަށަށު ކަލެއަކަށް އުނދަގުލެއް ނުކުރަމޭ.. ދޫކޮށްލަހަރޭ..

ފުރޭތަ: ނޫނެކޭ... މީ ކަނޑު ރަސްގެފާނުގެ ދަރިއޭ... ކަލޭ އެމަންޖެ އިންނަން އުޅޭ ސޮރަށް ވަލީ ދޭނީހޭ..؟ ނުނީ ނުދޭނީ ހޭ..؟ ކޮންމެވެސް އެއް ޖަވާބެއް ދޭށޭ..

އަންހެން ކުއްޖާގެ ބައްޕަ: އަހަރެން ވަލީ ދީފީމޭ... އޭނާ ގާތު ބުނާށޭ މާދަން ހެކިވެރިން ގޮވައިގެން އަންނާށޭ...

މިހެން ހަމަ ބުނުމާއެކު ފުރޭތަ އަންހެން ކުއްޖާގެ ބައްޕަ ގައިން ދޫކޮށް އޭތި އެއައި ތާކަށް ހިނގައްޖެއެވެ.

ޖެހިގެން އައި ދުވަހު ފިރިހެން މީހާ އެގެއަށް ދިޔުމުން، އަންހެން ކުއްޖާގެ ބައްޕަ ހެއްދެވި ނުހެއްދެވިއަށް ގޮވާ، ވަލީ ނުދޭނަމޭ ބުންޏެވެ. ދެން ފިރިހެން މީހާ، އަނެއްކާވެސް އަންހެން ކުއްޖާގެ ބައްޕަ އަށް ފާރަލަމުން ދަނިކޮށް ދެރޭ ފަހުން މިސްކިތަށް ދާން ނުކުމެއްޖެއެވެ. އެރޭ އަންހެން ކުއްޖާގެ ބައްޕަ އައީ ހަށި ރައްކަލަކަށް އެގޭގައި އުޅޭ އެހެން ފިރިހެނެއް ވެސް ގޮވައިގެންނެވެ. ނަމަވެސް ކުރީރެއެކޭ އެއްގޮތަށް ދުވެފައި ގޮސް ފަހަތުން ބައްދައި ބިންމައްޗަށް ވައްޓާލާފިއެވެ. އަންހެން ކުއްޖާގެ ބައްޕަ އާއި އެކީ ހުރި ފިރިހެންމީހާ ބިރުން ހޭނެތިގެން ދެމިއްޖެއެވެ. ކުރީ ރެޔާ ޚިލާފަށް މިރޭ ދޫކޮށްލީ، ދެން ވަލީ ނުދީފިއްޔާ މަރާލައިގެން ކާލާނޭ ކަމުގެ އިންޒާރުވެސް ދިީފައެވެ.

އަންހެން ކުއްޖާގެ ބައްޕަ މިކަން މިމަގަށް ހިންގާ ކަމެއް އެއްވެސް މީހެއް ގާތަކު ނުބުނެއެވެ. ހަމަ އެދުވަހު ހެނދުނާ ވަލީ ހޯދަން ދެ ހެކިވެރިންނާއެކު ފިރިހެން މީހާ ހިނގައްޖެއެވެ. ނަމަވެސް އެހެން ދުވަސް ތަކެކޭ އެއްފަދައިން، މިއަދު ވެސް މިކަމަށް އިންކާރު ކުރީއެވެ. ދަމުން އެ ފިރިހެން މީހާ، އަންހެން ކުއްޖާގެ ބައްޕަ އާއި ދިމާއަށް ބުންޏެވެ. ރާވެރިންގެ ދަރިންނަށް ވެސް ތިން އެތިފަހަރުން އެކެތި ފަހަރު އޮންނާނެއެވެ.

ދެން ފިރިހެން މީހާ، އަނެއްކާވެސް އަންހެން ކުއްޖާގެ ބައްޕަ އަށް ފާރަލަމުން ދަނިކޮށް ހަތަރުރޭ ފަހުން މިސްކިތަށް ދާން ނުކުމެއްޖެއެވެ. އެރޭ އަންހެން ކުއްޖާގެ ބައްޕަ އައީ އެގޭގައި އުޅޭ އެހެން ދެ ފިރިހެނުން ވެސް ގޮވައިގެންނެވެ. ނަމަވެސް ކުރީރެއެކޭ އެއްގޮތަށް ދުވެފައި ގޮސް ފަހަތުން ބައްދައި ބިންމައްޗަށް ވައްޓާލާފިއެވެ. އަންހެން ކުއްޖާގެ ބައްޕަ އާއި އެކީ ހުރި އެކަކު ބިރުން ދުއްވައި ގަތް އިރު އަނެއް ފިރިހެން މީހާ ބިރުން ހޭނެތިގެން ދެމިއްޖެއެވެ. ރަށުގައި އުޅުނު އަންދާލީ ކިޔާ މީހަކު މަރުވެގެން ސަންދޯއް ބަލާ އަންދާލީގެ ސޮރު ނިކުތީ ފާނޫޒެއް ހިފައިގެންނެވެ. މި އަންދާލީގެ ސޮރަކީ ފިސާރި ބިރުކުޑަ ސޮރެކެވެ. ދުވަމުން އައި މި ފިރިހެން މީހާއަށް އައި ލައިގަނެވުނީ އަންދާލީގެ ސޮރުގައިގައެވެ. ޚަބަރު އަހާލުމުން ވެގެން އުޅޭގޮތް ކިޔާ ދީފިއެވެ.

ފުރޭތަ އަކީ ކަނޑުގައި އުޅޭ އެއްޗެއް ކަން މިސޮރަށް އެނގެއެވެ. އެއްގަމަށް ފުރޭތަ އަރާ އުޅޭ ވާހަކަ އާއި ފުރޭތަ އަހަރެމެންނާ އަހަރެމެންގެ ބަހުން ވާހަކަ ދައްކާނޭ ބުނާވާހަކަ މި ސޮރު ގަބޫލެއް ނުކުރިއެވެ. އަވަސްވެ ގަތީ ފުރޭތަ އޮތްތަނަށް ދާށެވެ. އެހިސާބަށް ދިޔައިރު އަންދާލީގެ ސޮރަށް ފެނުނީ، އަންހެން ކުއްޖާގެ ބައްޕަ ގައި މައްޗަށް ފުރޭތަ އަރައި އޮއްވައެވެ. ފާނޫޒުން އަލިކޮށްލުމުން، އެއެއްޗެއްގެ ފައި ވައްތަރީ އިންސާނެއްގެ ފަޔާކަން އެނގުނެވެ. އަންދާލީގެ ސޮރު ބަލާކަށް ނުހުރެ ފުރޭތާގެ ގައިގަ ބައްދާ އަތުމުލައްދަނޑިއަށް ލެވުންހާ ބާރެއް ލާފައި ފުރޭތައިގެ ނޯއް މަތީ އަޅާ ވިހެލިއެވެ. ފުރޭތަ ޚަބަރު ހުސްވެގެން ދެމިއްޖެއެވެ.

ފުރޭތަ އަކާ ފުރޭތައެއް އެތަނަށް ދޫކޮށްލާފާ، އަންދާލީގެ ސޮރު، އެސޮރުގެ ބަފާ ވަޅުލުމަށް އެނބުރި ދިޔައީ އެވެ. ފަތިސް ނަމާދުން ފައިބައިގެން ދިޔަހާ ބަޔަކު އެމަންޒަރު ލޮލުން ދެކި، މުޅި ރަށުތެރަށް އަންދާލީގެ ސޮރު ފުރޭތައެއް މަރާލި ވާހަކަ ފެތުރިއްޖެއެވެ. ފަތިސްވެ ބިންމަތި އަލިވުމުން، އެއީ ފުރޭތައެއް ނޫންކަމާއި، އެއީ އަންހެން ކުއްޖާ ރަށްޓެހިވެގެން އުޅޭ މީހާކަން އެނގުނެވެ. އަންހެން ކުއްޖާގެ ބައްޕަ އަކީ ފަންޑިތަ ހެދުމާއި ސިހުރު ހާހޫރަށް ހެދުމަށް މަޝްހޫރު މީހަކަސް، ފުރޭތަޔަކާ، އިންސާނަކާ ދެނެގަންނަން ނޭނގުނުތާއެވެ. (ނައިފަރު އަޕްޑޭޓް ނިއުސްޓީމް) ކޑޒ

އިތުރަށް.. »

ސުފުރާ: ކިލާފަނި ބަތްޕެން

ކަނޑުމައްޗައް ބަލި، ހޮޑުލާ ކޮންމެ މީހަކަށް އެންމެ ރަނގަޅު ފަރުވާ އަކަށް ވާނީ ދަތުރު ކުރާއިރު ކަނޑު ކިތަންމެ ގަދަ ނަމަވެސް ބޯ އަނބުރާ ހޮޑު ނުލެވޭނެ ބޭހެއް ބޭނުން ކޮށްގެން ދަތުރަށް ތައްޔާރު ވުން ކަމުގައި ނޫނީ ނުވާނެއެވެ. ރާއްޖޭގެ މޮޅު ދިވެހި ބޭސްވެރިއެއް ކަމުގައި ޢަބްދުލް ޙަކީމް ކާންނާ ކަލޭފާނު މަޝްހޫރު ނަމުންނަމަ ނައިފަރު ދޮންކަލޭފާނު ހެއްދެވި މި ބޭހަކީ ގަދީމީ ޔޫނާނުގެ ބޭހެއް ކަމުގައި ބުނެވެއެވެ. ކިލާފަނި ބަތްޕެން ކައްކާފަ ހޫނުކަންމަތީ ހުއްޓާ ބުއިމުން ބަނޑުގެ ބަލިތަކަށްވެސް ފަރުވާ ލިބެއެވެ. ކިލާފަނި ބަތްޕެނުން ހޮޑުލުން، ބަނޑު ހަރުވުން، ވައިގެ އުނދަގޫފަދަ ބަލިތަކަށް ފަރުވާ ލިބެއެވެ.

ކިލާފަނި ބަތްޕެން ކައްކަން ބޭނުންވާ ތަކެތި

200 ގްރާމް ޅަހަނޑޫ (ބާސްމަތީ ހަނޑޫ)

2 ޖޯޑް ކާށި ކިރު

2/1 1 ސަމުސާ އަސޭމިރުސް (ހިމުންކޮށް މުގުރާފައި)

2/1 3 ސަމުސާ އަސޭމިރުސް (ނުމުގުރާ)

3 ޖޯޑް ފެން

1 ރާންބާ ފަތް 3 އިންޗި

2 ހިކަނދި ފަތް

1 ސައިސަމުސާ ރީނދޫ

1 ސައިސަމުސާ ކަރަންފޫ (މުގުރާފައި)

2 ސައިސަމުސާ ފޮނިތޮށި (މުގުރާފައި)

1 ފިޔާ (ހިމުންކޮށް މުގުރާފައި)

10 ކިލާފަނި (ފެނުން ރީތިކޮށް ދޮވެފައި މިކްސަރުން ފުނޑާފައި)

2 ސައިސަމުސާ ގިތެޔޮ

ހައްދަވާނެ ގޮތް

ފެން އަޅައިގެން ހަނޑޫ ކާށި ކިރު 1 ޖޯޑް އަޅައިގެން ކައްކާށެވެ. މި ފެންގަނޑު ހިނދުމުގެ ކުރިން މުގުރާފަ ހުރި އަސޭމިރުހާއި ފުނޑާފަ ހުރި ކިލާފަނި އަދި ފުށްކޮށް ނުމުގުރާ ހުރި އަސޭމިރުސް ފެންގަނޑު ތެރެއަށް އަޅައިގެން މަޑު ގިނީގައި 10 މިނިޓް ކައްކާށެވެ. ދެން ފިޔާ އާއި ފޮނިތޮށި ރާންބާފަތާއި ހިކަނދިފަތް އަދި ކަރަންފޫ އެއްކޮށް ގިތެލުގައި ހަނާކުރާށެވެ. ފިޔާކޮޅު ރަތްވުމުން ރީނދޫ އަޅައިގެން ކުލަ ހިފުމުން މީގެ ތެރެއަށް ކާށިކިރު 1 ޖޯޑް އެއްކުރުމަށްފަހު، ކައްކާފައި ހުރި ބަތް އެއްކުރުމަށްފަހު މަޑުގިނީގައި 5 މިނިޓް ކައްކާފައި އުނދުން މަތިން ބަލާށެވެ.

ނޯޓް: ދަރިފުޅަށް މިބަތްޕެން ދެއްވާއިރު މިއީ ކިލާފަނީގައި ކައްކާފައި ހުރި ބަތްޕެންކަމުގައި ނުބުނާށެވެ. އޭރުން ފަކުރު ގަތުމުގެ ސަބަބުން ދަރިފުޅު މިބަތްޕެން ނުބޮއިފާނެއެވެ. ދަރިފުޅު ހައިބަނޑާ ހުއްޓާ ހޫނުކޮށް، މިބަތްޕެން ބޯންދޭށެވެ.

(ނައިފަރު އަޕްޑޭޓް ނިއުސްޓީމް) ޗޗތ

އިތުރަށް.. »

އަފްރާޝީމުގެ މަރާއިމެދު ކުރެވޭ ކުށް ހީނތައް...

އަލްމަރުޙޫމް އަފްރާޝީމް ޢަލީ އަކީ އުނގޫފާރު ދާއިރާގެ ޢިއްޒަތެރި މެމްބަރެވެ. އުނގޫފާރު އެބޭފުޅަކަށް ފަޚުރުވެރިވާ ދަރިއެކެވެ. ދީނީ ޢިލްމު ވެރިއެއްގެ އިތުރުން ވާހަކަ ދެއްކުމުގެ ހުނަރު ލިބި ވަޑައިގެންވާ ކުޅަދާނަ ވާހަކަ ދެއްކުން ތެރިއެކެވެ. މަޖްލީހުގެ ތަޅުމުގައި ބަހުސްކުރެވޭ ދީނީ މައްސަލަ ތަކުގައި އިސްލާމް ދީނުގެ ހިމާޔަތުގައި މަސައްކަތް ކުރެއްވި ފަހުލަވާނެކެވެ. ދިވެހި ޤައުމު ފަޚްރުވެރިވާ ފަދަ ބަތަލެކެވެ. އެބޭފުޅާގެ މަރާއި ގުޅިގެން އެތައް ބަޔަކު ސޯޝަލް މީޑިއާ ތަކުގަޔާއި ނޫސްތަކުގައި މިފަދަ ބަޔާން ތައް ދެއްވިއެވެ. "މިފަދަ މުހިއްމު މަސައްކަތްތަކެއް ކުރައްވަމުން ވަޑައިގެންނެވި ބޭފުޅަކަށް މިފަދަ އަނިޔާވެރި ހަމަލާއެއްދީ ގަތުލުކުރުމަކީ މުޅި ގައުމަށް ލިބުނު ވަރަށް ބޮޑު ގެއްލުމެކެވެ. މި ބޮޑު ޖަރީމާގެ ފަހަތުގައިވާ މުޖުރިމުން ހޯދައި އެއުރެންނަށް ހައްގު އަދަބު ލިބެންޖެހޭނެ އެވެ،" އިސްލާމިކް މިނިސްޓްރީގެ ބަޔާނުގައިވެ އެވެ. "އަޅުގަނޑުމެންނަށް ގެއްލިގެން އެދިޔައީ އަގުހުރި ދިވެހި އިލްމީ ދަރިއެއް. އެމަރުޙޫމްގެ ފުރާނަފުޅަށް ސުވަރުގޭގެ ދާއިމީ ނިއުމަތް ލެއްވުން އެދި އަޅުގަނޑު ދުއާކުރަން،" ރައްޔިތުން މަޖްލީހުގެ ރައީސް ޝާހިދު ވިދާޅުވި އެވެ.

ނަމަވެސް ޖަވާބު ނުލިބޭ ސުވާލަކީ، އަފްރާޝީމްގެ ޙަޤީޤީ ޤާތިލަކީ ކާކުބާއޭ..؟ ކުރެވޭ ސުވާލެވެ. ވަރަށް ސާފުކޮށް މިސުވާލަށް ޖަވާބު ލިބޭނެއެވެ. އެންމެ ފުރަތަމަ އަފްރާޝީމް ގެންގުޅުއްވި ދީނީ މެދުމިނުގެ ޚިޔާލެވެ. ދީނީ ގޮތުން ޙައްދު ފަހަނަ އަޅާފައިވާ ބަޔަކު (ޑޮޓުން) އަފްރާޝީމަށް ދީފައިވާ އިންޒާރާއި، އަނިޔާއެވެ. އަފްރާޝީމަކީ، ބައެއް ދީނީ އިލްމުވެރިން "އިބިލީހުގެ" ނަމުގައި ސިފަކުރައްވާ ބޭފުޅެކެވެ. އަފްރާޝީމް އަވަހާރަކޮށްލި ރޭ އެ ބޭފުޅާ ގެއަށް ދުރުވީ އެބޭޅުގާގެ ކާރުކޮޅުގައި ގިނިކަންޏާ އެވެ. އެއީ ޓީވީ މޯލްޑިވްސް ގައި އޮތް ދީނީ ޕްރޮގްރާމެއް ގައި ބައިވެރިވެލެއްވުމަށް ފަހު ނިންމާފައި ގެއަށް ވަޑައިންނެވިި ވަގުތެވެ. އެރޭ އެބޭފުޅާ ވަނީ އެތައް ބަޔެއްގެ ކިބައިން މަޢާފަށްވެސް އެދިވަޑައިންފައެވެ.

ދިވެހި ރައްޔިތުންގެ ދީނީ އެއްބައިވަންތަކަމާ ބެހޭ ގާނޫނަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރުކަން ކުރެއްވި ޑރ. އަފްރާޝީމް އަލީ މުހިއްމު އިސްލާހުތަކެއް ހުށަހަޅުއްވާފައިވާ ކަމަށް އިސްލާމިކް މިނިސްޓްރީން ބުންޏެވެ. އަފްރާޝީމް ދިރިއުޅުއްވާ ހ. ފުން ވިލުގައި އެރޭ ދަންވަރު ތޫނު އެއްޗަކުން ހަމަލާދީ އޭނާ އަވަހާރަކޮށްލި މައްސަލަ ކުށްވެރިކޮށް އިސްލާމިކް މިނިސްޓްރީން ނެރުނު ބަޔާނެއްގައި ބުނެފައިވަނީ މަޖިލީހުގައި މިހާރު ތިއްބަވާ މެމްބަރުންގެ ތެރެއިން އަފްރާޝީމަކީ އެންމެ މަތީ ފާސް ނަންގަވައިގެން ހުންނެވި އެއް ބޭފުޅެއް ކަމަށެވެ. އޭނާ އަވަހާރަކޮށްލި އިރު، ދީނީ އެއްބައިވަންތަކަމާ ބެހޭ ގާނޫނަށް އިސްލާހު ގެނައުމަށް ވަރަށް ވަރުގަދަ އިސްލާހުތަކަކާ އެކުގައި ގާނޫނު ހަދާ މަޖިލީހަށް ހުށަހަޅުއްވާފައިވާ ކަމަށް މިނިސްޓްރީން ބުންޏެވެ. އެގޮތުން ފިގުހު އެކަޑަމީ އަށް ގާނޫނީ ބާރުވެރިކަން ލިބިދޭ އިސްލާހާއި ރާއްޖޭގައި އިސްލާމް ދީން ނޫން އެހެން ދީނަކަށް ފުރުސަތު ނުލިބޭ ގޮތަށް ގާނޫނީ ގޮތުން ކަނޑައަޅާ އިސްލާހާއި އެހެން ދީންތަކުގެ އަޅުކަންކުރާ ތަންތަން ރާއްޖޭގައި ބިނާކުރުން ގާނޫނީ ގޮތުން މަނާވާ ގޮތަށް އިސްލާހު ހުށަހަޅާފައިވެ އެވެ.

އަފްރާޝީމް އަވަހާރަކޮށްލުމުގައި ދީނުގެ ނަމުގައި ފިތުނަ ފަސާދަ އުފެއްދުމުގައި އަރާ ތިބި ބަޔަކު ވާނެ ކަމީ އެއްވެސް ޝައްކެތް ނެތް ކަމެކެވެ. މާލޭގެ ފިހާރަތަކުގައި ބަހައްޓާފައި ހުރި ބުދުތަކަށް ބަލާލަމާ ހިނގާށެވެ. އެއަށް އިޙްތިރާމް ކުރުމުގެ ގޮތުން ރީތި ހެދުން އަޅުވާ، މޭކަޕްކޮށް، ރައްކާތެރި ކަމާއި އެކު ބަލަހައްޓައެވެ. އަމިއްލަ ދަރިއަކު ރީތިކޮށް ނަލަކުރާގޮތަށް ނަލަ ކުރެއެވެ. ނަމަވެސް މި ބުދުތަކަށް ގޯނާ އެއް ގެއްލުމެއް ދޭނެ ދީނީ ބަޔަކުނުވެއެވެ. މިއާ ޚިލާފަށް ރާއްޖޭގައި ބުދު ދީނުގެ ފަލްސަފާ ފެތުރިގެން ގޮސްފައިވާ މިންވަރު ހާމަކޮށް ދިނުމަށް ޤައުމީ ދާރުސް އާސާރުގައި ޑިސްޕްލޭ ކުރެވިފައި ހުރި، ހުރިހާ ބުދުތަކެއް، ހަތެއް ފެބްރުއަރީގައި، ދީނަށް ލޯބިކުރާ ބަޔަކު ތަޅާ ސުންނާފަތި ކުރީއެވެ. މިފަދަ ތަރިކައަކީ، އަންނަން އޮތް ޖީލުތަކަށް ފޯރުވައިދޭން ޖެހޭ ތަކެއްޗެވެ. އަޅުގަނޑުމެންގެ ދަރިންނަށް ވިސްނައިދޭން ޖެހޭނީ އަޅުގަނޑުމެންގެ ކުރީގެ ކާބަފައިންނަކީ ކިހާ ނުވިސްނޭ ބަޔެއްކަމެވެ. އަތުން، ހިލައިން ހަދާފައިވާ ބުދުތަކަށް އަޅުކަން ކުރި ބުދުތައް އެކުދިންނަށް ފެންނަން ހުރުމަކީ އަޅުގަނޑުމެންނަށް ދެއްކެން ހުރި ހަމައެކަނި ހެއްކެވެ. ނަމަވެސް އެތަކެތި ހަލާކޮށް މުގުރާލުމުން އެގެއްލުނީ ފެންނަން ހުރި ކިތައް ހެކި ތޯއެވެ. މި ރާއްޖޭގައި ދާރުލް އާސާރުގައި ބަހައްޓާފައި ހުރި އެއްވެސް ބުދަކަށް އަޅުކަން ކުރާތީ ރާއްޖެ އިސްލާމްވީ ފަހުން، އެއްވެސް މީހަކު ނުދެކޭނެއެވެ.

ބައެއް މީހުން އަފްރާޝީމްގެ މަރުގެ ޒިންމާ އަޅުވަނީ ސިޔާސީ ފަރާތްތަކުގެ ބޮލުގައެވެ. ބައެއް ސިޔާސީ ޕާޓި ތަކުގެ އިސްވެރިންގެ ބޮލުގައެވެ. އެއްބަޔަކު، އަފްރާޝީމްގެ އަނބިކަނބަލުންގެ އިސްތަށިފުޅުގައިވެސް މި ތުހުމަތު އަޅުވައެވެ. ދޭތެރެއަކުން ފުލުހުންގެ ފަރާތުން، މި މަރުގެ ތަހުޤީޤަށް ކުރިއެރުން ލިބޭ ވާހަކަ އާއި، ވަރަށް އަވަހަށް މައުލޫމާތު އާންމު ކުރާނެ ކަމަށް ނޫސްވެރިންނަށް ދަންނަވައެވެ. މި މައްސަލާގައި ފުލުހުން ވަނީ ނުކުޅެދިފައިކަން، އަފްރާޝީމް ގެ މަރުގެ ތަހުޤީޤަށް ފަސްލައްކަ ރުފިޔާ ހުށަހަޅާ، އެމެރިކާގެ އެފް.ބީ.އައިގެ ދެ އިންވެސްޓިގޭޓަރުން ގެނައުމުންވެސް އަޅުގަނޑުމެންނަަށް އެނގިއްޖެއެވެ. އަފްރާޝީމްގެ މަރަކީ ސިޔާސީ ގޭމަކަށް ހެދުމަށް އެއްބަޔަކު މަސައްކަތް ކުރަމުންދާއިރު، މިހާތަނަށް ފުލުހުންނަށް ލިބިފައިވާ ގިނަ ގަރީނާތައް ބިނާ ވަނީ އަފްރާޝީމް އަވަހާރަކޮށްލީ ދީނީ ހަރުކަށި ޚިޔާލުގެ ބަޔަކުގެ ރޭވުމެއްގެ ދަށުންނެވެ.

ޑރ. އަފްރާޝީމްގެ މަރުގެ ތަހުގީގުގެ މައުލޫމާތު ފުލުހުން އާއްމުކުރުން ލަސްވަމުންދާތީ އަމާޒު ވެފައިވާ ފާޑުކިޔުންތަކާ ގުޅިގެން ސުވާލުކުރުމުން ކޮމިޝަނަރު ވިދާޅުވީ އެ މަރުގެ މައްސަލައިގެ ތަހުގީގާ ބެހޭ މައުލޫމާތު އާއްމުކުރާނީ އެ ހިސާބަށް ދެވިއްޖެ ކަމުގެ ޔަގީންކަމާ އެކުގައި ކަމަށެވެ. އެ މައުލޫމާތު އާއްމުކުރާނީ ފުލުހުން އެކަމަށް ތައްޔާރުވުމުން ކަމަށް ވެސް ކޮމިޝަނަރު ވިދާޅުވި އެވެ. ރިޔާޒު ވިދާޅުވީ އެއީ ވަރަށް ބޮޑު މައްސަލައެއް ކަމަށާއި ބަލަން ޖެހޭ ބެލުންތަކާއި ޔަގީންކުރަން ޖެހޭ ޔަގީންކުރުންތަކެއް އެބަހުރި ކަމަށެވެ.  ރިޔާޒު ވިދާޅުވެފައި ވަނީ ތަހުގީގާ ގުޅޭ ގޮތުން ފުލުހުން އާއްމުކުރާ މައުލޫމާތުތަކުގައި ސިޔާސީ އެއްވެސް ނުފޫޒެއް އެކުލެވިގެން ނުވާނެ ކަމުގެ ޔަގީންކަން ރައްޔިތުންނަށް ދެއްވާ ކަމަށެވެ. ކޮމިޝަނަރު ގެ މި ޢިބާރާތްވެސް، އަފްރާޝީމްގެ މަރުގެ ފަހަތުގައި ތިބި ބަޔަކީ، ދީނީ ހަރުކަށި ޚިޔާލުގެ (ޑޮޓުންގެ) ބަޔެއްކަން ވަރަށް ސާފުކޮށް މިއޮތީ ދޭހަވާށެވެ. މީހަކު ބުނާ އެއްޗެއްގެ މާނަ ރަގަނޅަށް ދޭހަ ނުވާ ކިތައް ކިތައް މީހުން މި ރާއްޖޭގައި ތިބޭނެ ބާއޭ ހިތަށް އަރައެވެ. (ނައިފަރު އަޕްޑޭޓް ނިއުސްޓީމް) ނދމ

(މިއީ ކިޔުންތެރިއަކު ފޮނުއްވެވި ލިޔުމެކެވެ. މިލިޔުމުގައި ވާ އެއްވެސް އެއްޗަކަށް އުނި އިތުރެއް ގެނެވިފައެއް ނުވާނެއެވެ.)

އިތުރަށް.. »

ހަންދަރު ކިރޭނީ މަހުންނަ...

ދުވަސް ވަރަކީ ދެވަނަ ބޮޑު ހަނގުރާމައިގެ އެންމެ ތަދު ދުވަސްވަރެވެ. ކޮންމެ ރަށެއްގައި "ކ.ހ" އޮފީހެއް (ކާޑު ހަވާލުކުރާ އޮފީހެއް) ހުރެއެވެ. ރަށުގެ ދޯނިފަހަރުން ބާނާ މަހުންވެސް ވަކި އަދަދެއް ކ.ހ އޮފީހަށް ނެގެމުން ދެއެވެ. ނައިފަރަކީ އަތޮޅުގެ ވެރިކަން ކުރާ ރަށަށް ވާތީ އަތޮޅުގެ އެހެން ރަށްތަކަށް ގެންނަ ކާޑުގެ ބާވަތްތަށް (ހަނޑޫ، ހަކުރު، ފުށް، ޒުވާރި ފަދަ ތަކެތި) ޖައްރާފު ބޯޓްގައި ގެނެސް ހަވާލު ކުރަނީ ނައިފަރު އޮފީހާއެވެ. އޭރު ނައިފަރުގެ އާބާދީއަކީ ގާތްގަނޑަކަށް 500 މީހުންނެވެ. ރަށުގައި ސިއްޙީ މަރުކަޒެއްގެ އިތުރުން މަދްރަސަތުލް އިފްތިތާހް ނަމަކަށް ކިޔާ މަދްރަސާއެއް ވެސް ހުރެއެވެ. މިއީ މާލެ ފިޔަވާ ރާއްޖެތެރޭގައި އުފެއްދި ފުރަތަމަ މަދުރަސާވެސް މެއެވެ.

ނައިފަރަކީ އެވޭލާ ޒަމާނުއްސުރެ މަސްވެރިން ގިނަ ރަށެކެވެ. މަސްވެރި އުލަނދު ފަހަރު ގިނަ ރަށެކެވެ. މަސްވެރިކަމުގައި އަތޮޅުގެ އެންމެ ކުރީގައި އުޅެނީ ނައިފަރޭ ބުނުމަކީ ބޭއިންސާފެއް ނޫނެވެ. ހެނދުނު ބޮޑު ފަތިހާ ރަށުގެ ދޯނިތައް މަހަށް ފުރައިގެން ދިޔުމަށް ފަހު، ހަވީރު އިރު އޮއްސުމުގެ ކުރިން ބޭނި މަސްކޮޅު ހިފައިގެން ރަށަށް ލަފާއިރު، މަސްކެއްކުމާއި މަސްދޮވެ ސާފުކުރުމަށް އަންހެން ވެރިން ތިބޭނީ ތައްޔާރުވެގެންނެވެ. ހައްސަ ބާނައިގެން އަންނަ ގިނަ ދޯނި ފަހަރު މަސްބާނާތަން ރަށުގެ ތުނޑީމަގަށް ފެންނާނެއެވެ. ސަބަބަކީ އޭރު މަސްވެރިން ބޭނުން ކުރަމުން ދަނީ ރިޔާ ދޯނި ކަމަށް ވެފައި، ދޯނި ފަހަރު އެންމެ ދުރަށް ވެސް ދާނީ ޅ. އަތޮޅު ކަނިފުށްޓާއި ހަމައަށެވެ. އެއީ ކަނިފުށީ ކޮޅުން މަސްބޭނި ޒަމާނެވެ.

ނައިފަރު ގައި ދުއްވާ "ގަހާ" ކިޔާ ދޯންޏަކުން މަސްބާނަން ނިކުމެ އުޅެނިކޮށް ދިމާވި ހާދިސާއެކެވެ. އެއީ އިރުވައި މޫސުމްގެ ހަޅަޖަހާ ދުވަސްވަރެވެ. ހަވީރު ވަގުތެއްގައި ހަތަރު އުދަރެސް ބައްދާލާފައި ހެދި ބޮޑު ވިލާ އެކެވެ. އޭރު ދޯނި އޮތީ ކަނިފުށީ މުއްޔާއި ދިމާ ބޭރުގައި މަސްބާނާށެވެ. އެންމެ ފަލަ މާރުގަނޑުގައި (އެންމެ ފަލަ ކުރު ދޮށީގައި ދަހިކޮށް މަސްބޭނުން) 3 ކިލޯ 4 ކިލޯ ވަރުގެ ފަލަ ގޮދާ ބާނަމުން ދަނިކޮށް، އައިނަށް އެރި ހިންނަވަރު ދޯންޏެކެވެ. ހިންނަވަރު ދޯނި އައިނަށް އަރަން ވާއިރަށް ގަހާ ދޯނިން ހަތަރު ވަތް ފުރާ ދޯނި މަހުން ބަރާކޮށްލައިފިއެވެ. އިތުރަށް ދޯނީގައި ތަން ނެތުމުން އެންކޮޅު ކަވާފައި (އެންކޮޅު މަސްތަށް ކެއުމަށް މަސް އައިނަށް އޮއްސާލުމަށް ފަހު) ހަތަރު އުދަރެސް ބައްދާލާފައި ހަދަމުން ދިޔަ ވިލާގެ ކުރިއަށް ރަށަށް ދެވޭތޯ ދީލާލީއެވެ. އަދި ހިންނަވަރު ދޯންޏާއި ކައިރި ކޮށްލާފައި ނަގަމުން ދާ ބޮޑު ވިލާ ދައްކާލުމަށް ފަހު "ގަހާ" ދޯނީގެ ކެޔޮޅު ހިންނަވަރު ދޯނީގެ ކެޔޮޅާއި މުޚާތަބުކޮށް އަވަހަށް ރަށާއި ދިމާއަށް ދޯނި އަނބުރާ ލުމަށް ވެސް ނަސޭހަތް ދިނެވެ. ނަމަވެސް އެ ދޯނީގައި ތިބި ގޮތްދޫނުކުރާ މީހުންގެ ޖަވާބަކީ "ހަންދަރު ކިރޭނީ ވިލާއަކުން ނޫނޭނަ... ހަންދަރު ކިރޭނީ މަހުންނަ.." އޭ ކިޔާ މަސްބާނަން ތިބީއެވެ.

"ގަހާ" ދޯނި ވޭވަށު މުއްޔާ އަރާ ހަމަ ނުވަނީސް ވިލާ ގަނޑު ޖެހިއްޖެއެވެ. ސަލާމަތުން ރަށަށް އާދެވުނީ ހަމަ ކިރިޔާއެވެ. ހިންނަވަރު ދޯނި ވިލާގަނޑުގެ ވަޔާއެކު ދިޔަ ތަނެއްވެސް އަދި އަދަށް ދާންވެސް އެނގޭ މީހަކު ނުވެއެވެ. ވިލާ ގަނޑާއެކު ދޯނި ބަންޑުން ޖަހާލީ ކަމެއް ވެސް ނޭގެނއެވެ. ބުނާ މީހަކަށް ނުބަލައި، ބުނާ ބަހަކަށް ބެލި ނަމަ އެމީހުންނަށްވެސް ސަލާމަތުން ރަށަށް އާދެވޭނެކަން ޔަޤީނެވެ. އެފަހުން މިސާލު ބަހެއްގެ ގޮތުގައި މިބަސް ބޭނުން ކުރެއެވެ. "ހަންދަރު ކިރޭނީ ވިލާއަކުން ނޫނެވެ. ހަންދަރު ކިރޭނީ މަހުންނެވެ." މިބަސް އާންމުކޮށް ބޭނުން ކުރަމުން ދިޔައީ ނަސޭހަތެއްގެ ގޮތުން ދުރާލާ ރައްކާތެރި ވުމަށް ބުނެ އުޅޭ ބަހެއްގެ ގޮތުގައެވެ. (ނައިފަރު އަޕްޑޭޓް ނިއުސްޓީމް) މލކ

އިތުރަށް.. »

ތާރީޚް: ބޯކުޑަ ވާހަކަ

ޅ. ނައިފަރަކީ ޒަމާނުއްސުރެ މަސްވެރި ރަށެކެވެ. މަސްވެރިކަމުގައި އަތޮޅުގެ އެންމެ ކުރީގައި އުޅެނީ ނައިފަރޭ ބުނުމަކީ ބޭއިންސާފެއް ނޫނެވެ. ހެނދުނު ބޮޑު ފަތިހާ ރަށުގެ ދޯނިތައް މަހަށް ފުރައިގެން ދިޔުމަށް ފަހު، ހަވީރު އިރު އޮއްސުމުގެ ކުރިން ބޭނި މަސްކޮޅު ހިފައިގެން ރަށަށް ލަފާއިރު، މަސްކެއްކުމާއި މަސްދޮވެ ސާފުކުރުމަށް އަންހެން ވެރިން ތިބޭނީ ތައްޔާރުވެގެންނެވެ. ހައްސަ ބާނައިގެން އަންނަ ގިނަ ދޯނި ފަހަރު މަސްބާނާތަން ރަށުގެ ތުނޑީމަގަށް ފެންނާނެއެވެ. ސަބަބަކީ އޭރު މަސްވެރިން ބޭނުން ކުރަމުން ދަނީ ރިޔާ ދޯނި ކަމަށް ވެފައި، ދޯނި ފަހަރު އެންމެ ދުރަށް ވެސް ދާނީ ޅ. އަތޮޅު ކަނިފުށްޓާއި ހަމައަށެވެ. އެއީ ކަނިފުށީ ކޮޅުން މަސްބޭނި ޒަމާނެވެ.

މަސްބާނައިގެން އަނބުރާ ހޭރިޔާ ކުރަމުން، ރަށަށް ލަފާއިރު ރަށުގެ ކުޑަކުދިން ތިބޭނީ އަތިރި މަތީ އެކުދިންގެ ބަފައިންގެ އިންތިޒާރުގައެވެ. ރަށުގެ ގިނަ މީހުން މަސްކައްކައިގެން ރިހާކުރަށް ހަދާ ކައިރި ރަށް ރަށަށާއި މާލެ އަށް ވިއްކަން ފޮނުވައެވެ. ނައިފަރު މަދުގަސްދޮށުގެ މިހާރު ހުންނަ ހިސާބުގައި އޭރު ބޮޑު ނިކަބިލިއްސަ (ނިކަ) ގަހެއް ހުރެއެވެ. އެހިސާބަކީ އޭރުގެ އަތިރި މަތީ ހިސާބު ކަމަށް ވާތީ ގަސް ގިނަ ސަރަހައްދެކެވެ. އެތަނުގައި ހުންނަ ނިކަބިލިއްސަ ގަހުގެ އެތެރެ ފަރާތުން ވަލު ތެރޭ ވީ ހިސާބުގައި އިންނަ ހޮހޮޅައެއް ކަހަލަ ތަނެއްގައި "ބޯ ކުޑަ" ނަމަކަށް ކިޔާ އަންހެނަކު އުޅެއެވެ. މި އަންހެން މީހާގެ ބޯ، އެންމެ ވައްތަރުވާނީ ކަށިކެޔޮ ގަނޑެއްގެ ސިފަ އާއި ނުވަތަ ދޮންކެޔޮ ގަހެއްގެ ބޯއްޓަކާ އެވެ. ބައެއް މީހުން މި އަންހެނާ ދެކެ ފިސާރި ބިރުވެސް ގަންނަ ކަމަށް ވެއެވެ.

ބޯކުޑަ އަކީ ނައިފަރު މީހަކަށް ލިބުނު ދަރިއެއް ކަމުގައި ވެސް ބުނެ އުޅެއެވެ. ބޯކުޑަ އަށް އަސްލު ކިޔަނީ އާމިނާ އެކެވެ. ވާހަކަ ދެއްކުމުގައި ކޮށި ކަމެއް ހުންނަ ބޯކުޑަ އަކީ މީހުންނަށް ވަރަށް ފަސޭހަ ކޮށްދޭ މީހެކެވެ. ދޯނިފަހަރުން ގެންނަ މަސް ކައްކާ ނުނިމެންޏާ މަސްކައްކަން އެހީތެރި ވެދެއެވެ. އާދައިގެ މީހަކަށް ނުކުރެވޭހާ ހަލުވިކޮށް ބޯކުޑަ މަސައްކަތް ކުރެއެވެ. ބޯކުޑަ ބަދިގެއަށް ވަންނަމުން ގޭގެ އަންހެން ވެރިންނަށް ބުނެއެވެ. "ހާނަ މަސްކައްކަންޏާ، ބަދިގެ އަށް ވަދެގެން ނުވާނެ.." އެވެ. ނަމަވެސް ބައެއް މީހުން ބޯކުޑަ ކުރާ ކަންތަކަށް ފާރަވެސް ލައެވެ. ފާރަލަނިކޮށް ބޯކުޑައަށް ފެނިއްޖެއްޔާ ދެން އެގެއަށް މަސްކައްކައިދޭކަށް ނާދެއެވެ. ކިތަންމެ ބައިވަރު މަހެއް ކައްކަން ހުއްޓަސް ފަޖުރު ލުމުގެ ކުރިން މަސްކައްކާ ނިންމާ، ތޮށެލި ދޮވެ ހުރިހާ ކަމެއް ނިންމާނެއެވެ.

ބޯކުޑައަށް ފާރަލީ މީހަކަށް ފެނުން ހަޤީޤީ ހާދިސާއެއް ހިއްސާ ކޮށްލާނަމެވެ. މަރީދައިތަ އަކީ މަސްވެރި ފިރިހެނެއްގެ އަނތްބެކެވެ. ހަވީރު މަހުން ލެފި ދޯނިން ގެނައި މަސް ކައްކަން ތޮށެލި މަތީ އަތުރާ، މަސްކަނޑާ ހަދައިގެން ކައްކަން ތައްޔާރަށް ހުއްޓާ މަރީދައިތަގެ އެންމެ ކުޑަ ސޮރު ހޭލައިގެން ރޯތީ މަސްކައްކަން އުނދުންމައްޗަށް ފެން އުދާފާ، ކުޑަސޮރަށް ބުއްދީ ނިންދަވަން އުނދޯލީގައި އިންދާ ބޯކުޑަ އަތުވެއްޖެއެވެ. ބޯކުޑަ ބަދިގެ ކައިރިއަށް އަރާ ހަމަވެފައި "ހާނަ މަސްކައްކާ ހަދަނީ.." މިހެން ބުންޏެވެ. މަރީދައިތަ ކުޑަސޮރު ނިދީމާ، ބަދިގެއަށް ވަންނަން ދިޔައިރު ފުރަތަމަވެސް ފެނުނު މަންޒަރުން ބިރުން ގަޔަށް ފަހަރުވަ ލެވިއްޖެއެވެ. ބޯ ކުޑަ އިނީ އުނދުނަށް ދެފައި ކޮށްޕައިގެން މަސްކައްކާށެވެ. ހީވަނީ ގޭސް އުނދުނަކުން އެންމެ ބާރު ސްޕީޑްގައި ގޭސްދޫކޮށްލާފަ ހުރުމުން އަލިފާންގަނޑު ވަށައިގެން ހިފައިފާ ހުރިހެންނެވެ. މަރީދައިތަ ގަންނާ ކުރެއްވި ބިރުން އަވަހަށް ގެއަށް ވަނީ އެވެ. ދަންވަރު 1 ނުޖަހަނީސް ބޯކުޑަ މަސްކައްކާ ނިންމާ، ތަންސާފުކޮށް ގެއަށް ދަމުން "ހާނަ މިގެންދަނީ، ބޮލު ބަނޑައި ފޮއްޗެކެ.." ބުންޏެވެ.

ކިތަންމެ ބައިވަރު މަހެއް ކައްކައި ދިނަސް ބޯކުޑަ ގެންދާނީ، ބަނޑައިދުލަކާއި، މަހުގެ ބޮލަކާއި، ކަށިފޮއްޗެކެވެ. އެއީ ބޯކުޑަ ކެއުމަށާއި  އޭނާ ގެންގުޅޭ ކުދި ފިޔޮއް ތަކަށް ކާންދޭށެވެ. ބޯކުޑަ އަކީ އަވަށްޓެއްސެއް ކަމަށްވެސް މީހުން ސިފަކުރެއެވެ. ބޯކުޑަ ދުވާލުގެ ވަގުތު ތަކުގައި ބޭރަކަށް ނުނިކުމެއެވެ. ސަބަބަކީ އޭނާގެ ސިފަ ފެނި މީހުން ބިރުގަންނާތީ ކަމަށް ވެސް ވެދާނެއެވެ. (ނައިފަރު އަޕްޑޭޓް ނިއުސްޓީމް) ކޑޒ

އިތުރަށް.. »