ބަތަލާއެއްގެ ހަށިގަނޑަށް ޖިންނިއެއް ވަދެއްޖެ

ސޯޝަލް މީޑިއާގައި ކެމްބޯޑިއާގެ ބަތަލާއަކު ބިރުވެރި ފިލްމެއްގެ ޝޫޓިންގައި އުޅެނިކޮށް އޭނާގެ ހަށިގަނޑަށް ޖިންނިއެއް ވަދެއްޖެ ކަމަށް ބުނެ އެކަމާ ގުޅޭ ވީޑިއޯއެއް އާންމުކޮށްފި އެވެ.

ބިރުވެރި ފިލްމު ކުޅޭ އެކްޓަރުންނަށް ބައެއް ފަހަރަށް މިކަހަލަ ކަންތައްތައް ދިމާވާ ކަމުގެ ޚަބަރުތައް ދޭތެރެ ދޭތެރެއިން އިވެ އެވެ. އަދި ފިލްމުގެ ކުރޫގެ ބައެއް މެމްބަރުންނަށް ވެސް މިފަދަ ހާދިސާތައް ބައެއް ފަހަރަށް ދިމާވެފައި އެބަހުއްޓެވެ. މިހެން ދިމާވަނީ ރޫހާނީ އެއްޗެހީގެ ނުވަތަ ޖިންނި ޝައިތާނުންގެ ރޯލުތައް ކުޅޭއިރު އެ އެކްޓަރެއްގެ ނެގެޓިވް އެނާޖީ އިތުރުވާތީ ކަމަށް ތަޖުރިބާކާރުން ބުނެ އެވެ.

ކެމްބޯޑިއާގެ މީޑިއާތަކުން ބުނެފައިވާ ގޮތުގައި ޖިންނީގެ އުނދަގޫ ފޯރި ބަތަލާ ވަނީ އެ މައްސަލަ ދިމާވުމާ އެކު އޭނާއާ އެކު ފިލްމުގެ ޝޫޓިންގައި ބައިވެރިވާ އެހެން ބަތަލާއެއްގެ ކަރުގައި ހިމަ ވާފަށެއް ބައްދައި އޭނާ މަރާލަން މަސައްކަތް ކޮށްފަ އެވެ. އަދި މިކަމުގެ ސަބަބުން ފިލްމުގެ ކުރޫގެ ގިނަ ބަަޔަކަށް ވަނީ ބިރުވެރިކަމެއް ކުރިމަތިވެފަ އެވެ.

ފިލްމުގެ ކުރޫގެ ތެރޭގައި ހިމެނޭ މީހަކު ފޭސްބުކްގައި ޝެއާކޮށްފައިވާ މި ވިޑީއޯގެ ތިރީގައި ކެމްބޯޑިއާ ބަހުން ލިޔެފައިވާ ލިޔުންކޮޅުގައި ބުނެފައިވަނީ އެ ޓީމުގެ ތެރޭގައި ރޫހާނީ ކަންތައްތަކެއް ހިނގައިފި ކަމަށާއި މިއީ އެފަދަ ކަމެއް ދިމާވި ފުރަތަމަ ފަހަރު ކަމަށެވެ. އަދި އޭނާ އަށާއި ކެމެރާ ޓީމަށް ވެސް ރޫހުގެ އުނދަގޫ ފޯރި ކަމަށެވެ.

މިއީ އަސްލު ހިނގާފައިވާ ކަމެއް ކަމެއް ނުވަތަ ބަޔަކު މީހުން ގަސްތުގައި ހަދައިގެން އުޅޭ ވީޑިއޯއެއް ކަމެއް ޔަގީނެއް ނޫނެވެ. ފިލްމު ކުރޫގެ މީހަކު ބުނީ ޝޫޓްކުރަމުންދިޔަ ފިލްމަކީ އޭނާގެ ބޮޑުދައިތައަކަށް ދިމާވި ހަގީގީ ހާދިސާއަކަށް އުފައްދަމުން ދިޔަ ފިލްމެއް ކަމަށާއި ފިލްމުގައި ދައްކަނީ ކޮޓަރިއެއްގެ ތެރޭގައި އުޅޭ ރޫހެއް ކަމަށެވެ.




.:ނައިފަރު އަޕްޑޭޓް ނިއުސްޓީމް:. މސ ޢލ

އިތުރަށް.. »

ފައިސަލް އާއި ޝަފާއު ހައްޔަރުކުރި ކަމަށް ފަތުރަމުންދަނީ ދޮގު ވާހަކައެއް : ފުލުހުން

މީޑިއާތަކަށް ފުލުހުން ފޮނުވި މެސެޖެއްގައި ބުނީ ފައިސަލް އާއި ޝަފާއު ހައްޔަރުކުރި ކަމަށް ފަތުރަމުންދަނީ ހަގީގަތާ ޚިލާފު ވާހަކައެއް ކަމަށެވެ. އިތުރު ތަފްސީލެއް ނުދެ އެވެ.

މި ދެ މީހުން ހައްޔަރުނުކުރާ ކަމަށް ފުލުހުން ބުނާއިރު ފައިސަލް އިއްޔެ މެންދުރެއްހާއިރު، ފުލުސް އޮފީހަށް ހާޒިރު ކުރުމަށް ފަހު ދޫކޮށްލީ ރޭ ހަތަރެއް ޖެހިއިރެވެ. އޭނާގެ މައްޗަށް ކުރާ ތުހުމަތެއް ފުލުހުން ހާމަނުކުރާ ކަމަށް ވަކީލުން ވިދާޅުވި އެވެ.

ޝަފާއު ވެސް ރޭ ޕޮލިހަށް ހާޒިރުކުރި އެވެ. އެކަމަކު އޭނާގެ މައްޗަށް ވެސް ކުރާ ތުހުމަތެއް ސާފެއް ނޫނެވެ.



ފަނޑިޔާރުންގެ މަސައްކަތަށް ނުފޫޒު ފޯރުވުމަށް ރިޝްވަތުގެ ފައިސާ ދިނުމާއި ރިޝްވަތުގެ ގޮތުގައި ލިބިފައިވާ ފައިސާ ބޭނުންކޮށްގެން މަންފާ ހޯދި ކަމުގެ ތުހުމަތުގައި ޗީފް ޖުޑިޝަލް އެޑްމިނިސްޓްރޭޓަރު ހަސަން ސައީދު ވަނީ މި މަހުގެ ފަސް ވަނަ ދުވަހުގެ ރޭ ހައްޔަރުކޮށްފަ އެވެ. އަދި އޭނާގެ ކޮޓަރީގައި ނިދާ އެނދުގެ ގޮދަޑި ދަށުން ގިނަ އަދަދެއްގެ ފައިސާ ފެނިފައިވާ ކަމަށާއި އޭގެ އިތުރު ހެކިތައް ވެސް ހޯދާފައިވާ ކަމަށް ފުލުހުން ކުރިން ބުނެފައި ވެ އެވެ. ގާނޫނާ ޚިލާފަށް ވެރިކަން ބަދަލުކުރުމަށްޓަކައި ރިޝްވަތު ހިފި ކަމުގެ ތުހުމަތުގައި އުއްތަމަ ފަނޑިޔާރު އަަބްދުﷲ ސައީދާއި ފަނޑިޔާރު އަލީ ހަމީދުގެ އިތުރުން ފަސް މީހަކު ވެސް ފުލުހުން ވަނީ ހައްޔަރުކޮށްފަ އެވެ.

އޭގެ ތެރޭގައި ކުރީގެ ރައީސް މައުމޫން އަބްދުލް ގައްޔޫމާއި އެމަނިކުފާނުގެ ދަރިކަލުން ދިއްގަރު ދާއިރާގެ މެމްބަރު އަހުމަދު ފާރިސް މައުމޫނާއި ޖުމްހޫރީ ޕާޓީގެ ލީޑަރު ގާސިމް އިބްރާހީމްގެ ދަރިކަލުން އަދި ވިލާ ކުންފުނީގެ މެނޭޖިން ޑިރެކްޓަރު އިބްރާހިމް ސިޔާދު ގާސިމާއި މައުމޫންގެ ދަނބިދަރިކަލުން މުހައްމަދު ނަދީމާއި މައްޗަންގޮޅި ދެކުނު ދާއިރާގެ މެމްބަރު އަބްދު ﷲ ސިނާން އަދި ފަނޑިޔާރު އަލީ ހަމީދުގެ އަނބިކަނބަލުން ފާތިމަތު ނާސިރާ ހިމެނެ އެވެ.



.:ނައިފަރު އަޕްޑޭޓް ނިއުސްޓީމް:. ޝރފ

އިތުރަށް.. »

އައިޑޮލްގެ މި ސީޒަން ހޮސްޓުކުރާނީވެސް މުސާ ވަސީމް:ގަމް

ޕީއެސްއެމްގެ ޑިރެކްޓަރު، ޓީވީ މުހައްމަދު ނިޔާޒް (ގަމް) ވިދާޅުވީ މި މަހު 2 ގައި ފެށުމަށް ހަމަޖެއްސުމަށް ފަހު ފަސްކުރި ޕްރިމިއާ އޮންނާނީ ބުރާސްފަތި ދުވަހުގެ ރޭ ދިހައެއް ޖަހާއިރު ކަމަށެވެ. އޭނާ ވިދާޅުވީ އޮޑިޝަންގެ ޝޯތައް ބުރާސްފަތި، ހުކުރު އަދި ހޮނިހިރު ދުވަހު ވެސް ދައްކާނެ ކަމަށެވެ.

ނަމަވެސް އާންމުކޮށް އައިޑަލް ދައްކާނީ ކޮންމެ ހުކުރު ދުވަހަކާއި ހޮނިހިރު ދުވަހު ކަމަށް ވެސް އޭނާ ވިދާޅުވި އެވެ.

މިހާތަނަށް އައިޑޮލްގެ ކާމިޔާބު 2 ސީޒަން ގެނެސްފައި ވާއިރު ކޮންމެވެސް ވަރެއްގެ ތަފާތުތަކެއް ޝޯގެ ހޮސްޓުންނާއި ޖަޖުންގެ ޕެނަލުން މި ސީޒަންގައި ފެންނާނެ އެވެ. މި ސީޒަން ހޮސްޓުކުރާނީ ކުރީ ދެ ސީޒަން ވެސް ހޮސްޓުކުރި މުސާ ވަސީމްގެ އިތުރުން އަލަށް ގުޅުނު މަޝްހޫރު ރޭޑިއޯ ޕްރެޒެންޓާ ޝައިނާ ޝަރީފެވެ. ކުރީ ފަހަރުތަކާ ޚިލާފަށް ޖަޖުންގެ ޕެނަލުގައި މި ފަހަރު ހަތަރު ޖަޖުން ތިބޭނެ އެވެ. އެއީ ކުރީގެ ދެ ސީޒަންގައި ވެސް ޖަޖުކަން ކުރި މަރިޔަމް އުނޫޝާ (ކިޑީ)، ފުރަތަމަ ސީޒަންގައި ޖަޖުކުރި އަހުމަދު އަލީ (އައްމަޑޭ) އަދި ދެ ވަނަ ސީޒަންގެ ޖަޖު އިސްމާއިލް އައްފާން އެވެ. ޖަޖުންގެ ޕެނަލާ އަލަށް ގުޅިފައި ވަނީ ޒުވާން ލަވަކިޔުންތެރިޔާ ޒާރާ މުޖުތަބާ އެވެ. މޯލްޑިވިއަން އައިޑޮލްގެ ސީޒަން ދޭއް ކާމިޔާބުކޮށްފައި ވަނީ މުހައްމަދު ތަސްނީމް (ބޮބް) އެވެ. އަދި ފުރަތަމަ ސީޒަން ކާމިޔާބުކޮށްފައި ވަނީ ލައިޝާ ޖުނައިދު އެވެ.

.:ނައިފަރު އަޕްޑޭޓް ނިއުސްޓީމް:. ފރހދ

އިތުރަށް.. »

ޓީޗަރަކު ދަރިވަރުންތަކަކަށް ޖިންސީ ގޯނާ ކުރި މައްސަލައެއް އިއްޔެ ފެންމަތިވެއްޖެ

އިންޑިއާގެ ހައިދަރާބާދުގައި އެޤައުމުގެ ސަރުކާރުން ހިންގަމުންދިޔަ ސްކޫލެއްގައި، ޓީޗަރަކު ދަރިވަރުންތަކަކަށް ޖިންސީ ގޯނާ ކުރި މައްސަލައެއް އިއްޔެ ފެންމަތިވެ ބަލަން ފަށައިފިއެވެ.

ސުލްތާން ބާޒަރު ޕޮލިސްޓޭޝަންގެ ފުލުހުން މި މައްސަލަ ބަލަން ފަށާފައި ވަނީ، އެޤައުމުގައި ކުޑަކުދިންގެ ހައްޤުތައް ޙިމާޔަތްކުރުމަށް މަސައްކަތް ކުރާ ޖަމިއްޔާއަކުން، އެ ސްކޫލުގެ ދަރިވަރުންގެ ފަރާތުން ފުލުހުންނަށް މައްސަލަ ހުށަހެޅުމާއި ގުޅިގެންނެވެ.

މި ހާދިސާ ފެންމަތިވެފައި މިވަނީ، މިދިޔަ ޖެނުއަރީ މަހުގެ ކުރީކޮޅުގައި ވެސް، ސުލްތާން ބާޒަރު ޕޮލިސް ސްޓޭޝަނަށް އެ ސްކޫލުގެ ފަސް ދަރިވަރަކު، އެކުދިންނަށް ޓީޗަރުން އަނިޔާކުރާކަމުގެ ރިޕޯޓް ކޮށްފައިވަނިކޮށެވެ.

އޮފިޝަލުން ބުނެފައިވަނީ، ޓީޗަރަކު އަނިޔާ ކުރާތީ މިދިޔަ މަހު ދަރިވަރުން ހުށަހެޅި މައްސަލައާއި އެކު، އޭނާ އާއި މެދު ފިޔަވަޅު އެޅުމަށް އެ ދަރިވަރުން އެދިފައިވާ ކަމަށެވެ. އަދި އޭގެ ފަހުން މިމަހު ހުށަހަޅާފައިވާ ޖިންސީ ގޯނާގެ މައްސަލައަކީވެސް އެ ޓީޗަރު މީހާ އާއި ގުޅުންހުރި މައްސަލައެއް ކަން އެނގިފާއިވާ ކަމަށް އެފަރާތުން ވަނީ ބުނެފައެވެ.

މި މައްސަލަ އާއި ގުޅިގެން އެ ސްކޫލު ނުވަތަ ސްކޫލުގެ ޓީޗަރަކާއި މެދު މިހާތަނަށް ފިޔަވަޅެއް އަޅާފައިވާކަމެއް އޮފިޝަލުން ހާމަކޮށްފައެއް ނުވެއެވެ. އަދި މި މައްސަލަތައް ގުޅިފައިވަނީ ކޮން ސްކޫލަކާއި ކަމެއްވެސް އެފަރާތުން އަދި ހާމައެއް ނުކުރެއެވެ.

މި ހާދިސާ ހިނގާފައި މިވަނީ، އިންޑިއާގެ ސްކޫލްތަކުގައި ދަރިވަރުންނަށް ޓީޗަރުންގެ ފަރާތުން އަނިޔާ ލިބޭކަމުގެ ގިނަ މައްސަލަތައް ފެންމަތިވަމުންދާ ދުވަސްވަރެއްގައެވެ. އެގޮތުން ޓީޗަރެއްގެ ފަރާތުން ލިބުނު އަނިޔާގެ ސަބަބުން ފަރުވާދެމުން ދަނިކޮށް، އެޤައުމުގެ ބާލިއާ ސިޓީން މިދިޔަ ހަފްތާގައިވެސް އުމުރުން 11 އަހަރުގެ އަންހެން ކުއްޖަކު މަރުވެފައި ވެއެވެ.

އިތުރަށް.. »

ކުޑަ އަންހެންކުއްޖަކު ރޭޕްކުރި ޔަމަނު މީހަކު ގިނަ ބައެއްގެ ކުރިމަތީގައި ބަޑި ޖަހާ މަރާލައިފި

ފަހަކަށް އައިސް ދުނިޔޭގެ ގައުމުތަކުގައި ކުޑަކުދިން ރޭޕް ކޮށް މެރުން މިވަނީ އާންމުވެފައެވެ. އެގޮތުން މިއަހަރުގެ ތެރޭގައި ޕާކިސްތާނުގައި ވެސް ވަނީ އަންހެން ކުއްޖަކު ރޭޕްކޮށް މަރާލައިފައެވެ. އޭގެ ފަހުން އިންޑިއާގައިވެސް ވަނީ ކުއްޖަކު ރޭޕް ކުރުމަށް ފަހު މަރާލައިފައެވެ.

ކުޑަ އަންހެންކުއްޖަކު ރޭޕްކޮށް މަރާލި މީހަކު ގިނަ ބައެއްގެ ކުރިމަތީގައި އަނިޔާވެރިކޮށް މަރާލައިފިއެވެ.

މަރާލައިފައިވަނީ ޔަމަނުގެ ރައްޔިތެއްކަމަށްވާ އުމުރުން 41 އަހަރުގެ މުހައްމަދު އަލް މަޤްރަބީ ނަމަކަށް ކިޔާ މީހެކެވެ. އޭނާ މަރާލީ ތިން އަހަރުގެ އަންހެން ކުއްޖެއް ރޭޕް ކުރުމަށް ފަހު މަރާލުމުންނެވެ.

މުހައްމަދު އަލް މަޤްރަބީ މަރާލާފައި ވަނީ ޔަމަނުގެ ވެރިރަށް ސަނާގައި މެޝިން ގަންއެއް ބޭނުންކޮށްގެންނެވެ. އަލް މަޤްރަބީގެ ބުރަކަށްޓާއި މޭމަށްޗަށް އެތަށް ފަހަރަކު ވަނީ މެޝިން ގަން ބޭނުންކޮށްގެން ބަޑި ޖަހާފައެވެ.

އަލް މަޤްރަބީ މަރާލިތަނަށް ގިނަ ބަޔެއްގެ އިތުރުން އެގައުމުގެ ގިނަ މީޑިއާތައް އެއްވެފައިވާއިރު އެގައުމުން ބުނަނީ އެފަދައިން އޭނާއާއި މެދު ކަންތައް ކުރީ މުޖުތަމައުން އެފަދަ އަހުލާޤީ ކުށްތަށް މަދު ކުރުމަށް ކަމުގައެވެ. އަދި ހަމައެހެންމެ ރޭޕްކޮށް އަނިޔާވެރިކަމާއިއެކު ކުއްޖެއް މަރައިފިނަމަ އެމީހަކަށް އޮތް އަދަބަކީވެސް މަރު ކަމަށް އެގައުމުން ބުނެއެވެ.

އިތުރަށް.. »

އެންމެ ފަހުން އަމިއްލައަށް ފުލުސް އޮފީހަށް މިއަދު ހެނދުނު ހާޒިރުވެއްޖެ

ރައްޔިތުންގެ މަޖިލީހުގެ ދަނގެތީ ދާއިރާގެ މެމްބަރު އިލްހާމް އަހުމަދު ފުލުހުން ބަލާ މައްސަަލައެއްގެ ތަހުގީގުގެ ބޭނުމަށް ހޯދަން އިއުލާން ކޮށްފައިވާތީ، އެންމެ ފަހުން އަމިއްލަ އަށް ފުލުސް އޮފީހަށް މިއަދު ހެނދުނު ހާޒިރުވެއްޖެ އެވެ.
ފުލުހުން ކުރި ޓުވީޓެއްގައި ބުނީ، މިއަދު ހެނދުނު 11:37 ގައި އިލްހާމް ފުލުސް އޮފީހަށް ހާޒިރުވެފައިވާ ކަމަށެވެ.

އިލްހާމާއި މައްޗަންގޮޅީ ދެކުނު ދާއިރާގެ މެމްބަރު އަބްދުﷲ ސިނާން ހޯދަން މިދިޔަ ހުކުރު ދުވަހު ފުލުހުން އިއުލާން ކުރީ އިކޮނޮމިކް ކްރައިމް ޑިޕާޓްމެންޓުން ބަލަމުންދާ މައްސަލައަކާ ގުޅިގެންނެވެ. އެއީ ގާނޫނާ ޚިލާފަށް ވެރިކަން ބަދަލުކުރުމަށް ރިޝްވަތު ދީ އަދި ރިޝްވަތު ހިފި މައްސަލައެއް ކަމަށް ފުލުހުން ބުނެފައިވެ އެވެ.

ފުލުހުން ވަނީ އިއްޔެ އާއި މިއަދު އިލްހާމްގެ އަންހެނުން އައިމިނަތު މާޝާ ފުލުސް އޮފީހަށް ހާޒިރުކޮށް ހައްޔަރުކޮށްފަ އެވެ. ފުލުސް އޮފީހަށް ހާޒިރުވުމަށް އަންގައި ރޭ މާޝާ ދޫކޮށްލި އެވެ. އެ އެންގުމާ ގުޅިގެން މާޝާ މިއަދު ފުލުސް އޮފީހަށް ހާޒިރުވި އިރު، އޭނާއާ އެކު، އިލްހާމްގެ ކޮއްކޮ އާދަމް ޒާލިފް ފުލުސް އޮފީހަށް ދިޔުމުން ފުލުހުން ވަނީ ޒާލިފްގެ ފޯނު އަތުލައިފަ އެވެ.

މިދިޔަ އަހަރުގެ މެދުތެރެއިން ފެށިގެން ސިނާނާއި އިލްހާމް ރާއްޖެ އިން ބޭރުގައި އުޅުއްވަނިކޮށް ވެސް އެ ދެ ބޭފުޅުން ފުލުހަށް ހާޒިރުވުމަށް ފުލުހުން އިއުލާން ކުރި އެވެ. އޭގެ ފަހުން މި ދިޔަ ހަފުތާގައި ރާއްޖެ ވަޑައިގަތުމާ އެކު ފުލުހުން އެ ދެ ބޭފުޅުން ހައްޔަރުކުރި އެވެ. އަދި ޖެހިގެން އައި ދުވަހު، ބަންދުގެ މުއްދަތާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރު ކުރުމުން އެ ކޯޓުން ވަނީ އެ ދެ ބޭފުޅުން މިނިވަންކޮށްފަ އެވެ.

އިތުރަށް.. »

3.4 މިލިއަން ރުފިޔާ ފެނުނީމަ ހައްޔަރު ކުރުން މާ ލަސްވެއްޖެ: އަދުރޭ

ފުލުހުން ރޭ ހާމަކުރި މައުލޫމާތުގައިވާ ގޮތުން ސުޕްރީމް ކޯޓުގެ ފަނޑިޔާރު އަލީ ހަމީދަށް ނިސްބަތްވާ ދަބަހަކުން 3.4 މިލިއަން ރުފިޔާ ވަނީ ފެނިފަ އެވެ.

އަދި ކުރީގެ ރައީސް މައުމޫން އަބްދުލްގައްޔޫމް ދިރިއުޅުއްވާ މ. އެންދެރިމާގެ އިން ގެންދިޔަ ފޮއްޓަކުން، ތަހުގީގަށް ބޭނުންވާ ހެކި ހޯދާފައިވާ ކަމަށް ވެސް ފުލުހުން ވަނީ ބުނެފަ އެވެ.

ޕީޕީއެމް އޮފީހުގައި ބޭއްވި ނޫސްވެރިންގެ ބައްދަލުވުމުގައި އަބްދުއްރަހީމް ވިދާޅުވީ ކޮންމެ މީހަކު ވެސް މަސައްކަތް ކުރަމުން އަންނަނީ ވެރިކަމަށް އަންނަން ކަމަށެވެ. އަދި އިދިކޮޅު ފަރާތްތަކަކީ ގައުމަށް ހެޔޮ އެދިވަޑައިގަންނަވާ ބޭފުޅުން ނޫންކަން ސާފުވެގެން ގޮސްފައިވާ ކަމަށް އޭނާ ވިދާޅުވި އެވެ.

ފަނޑިޔާރު އަލީ ހަމީދަށް ފާޑު ކިޔައި އަބްދުއްރަހީމް ވިދާޅުވީ "ގޭތެރޭގައި އޮތް ކަޅު ދަބަހަކުން 3.4 މިލިއަން ރުފިޔާ ފެނުނީމަ ހައްޔަރު ކުރުން މާ ލަސްވެއްޖެ" ކަމަށެވެ. އަދި ޕީޕީއެމުން ފަނޑިޔާރުންނާ ގުޅޭ ގޮތުން ކުރިން ދެއްކި ވާހަކަ ހަގީގަތަކަށްވެފައިވާ ކަމަށް އޭނާ ވިދާޅުވި އެވެ.

މި މަހުގެ ފަސް ވަނަ ދުވަހު ޕީޕީއެމުން ބޭއްވި ޖަލްސާގައި އަބްދުއްރަހީމް ވިދާޅުވީ ސިޔާސީ ލީޑަރުންތަކެއް މިނިވަން ކުރުމަށް ކުރި އަމުރަކީ "ފަނޑިޔާރުންނާ ކޮންމެވެސް ބާވަތެއްގެ ގުޅުމެއް އޮތީމަ" ވީ ގޮތެއް ކަމަށާއި އެހެން ނޫން ނަމަ އެކަން ނުހިނގީސް ކަމަށެވެ.

"އަލީ ހަމީދުގެ ދަބަސްގަނޑަކުން 3.4 މިލިއަން ރުފިޔާ ނެގުނީމަ ދެން ވިސްނާ ތިޖޫރި އާއި އެކައުންޓުތަކުގައި ހުންނާނެ ފައިސާގެ އަދަދު. ގޭގައި އޮތް ކުޑަ ދަބަހަކުން ނެގިވަރު މިއީ،" ފޮނަދޫ ދާއިރާގެ މެމްބަރުކަން ކުރައްވާ އަބްދުއްރަހީމް ވިދާޅުވި އެވެ.

އަބްދުއްރަހީމް ވިދާޅުވި ގޮތުގައި ފްލައިޓެއް ވެއްޓުނީމަ، އެންމެ ބާރަށް ދުވާނީ ބޯޓުގެ ކަޅު ފޮށި ހޯދުމަށެވެ. މި ބަޣާވާތުގެ ކަޅު ފޮށި "ދަމައި ނެރުނީ" އެންދެރިމާގެ ތެރެއިން ކަމަށާއި ބަޣާވާތުގެ ގިނަ މައުލޫމާތު އެ ފޮށީގައި ހުންނާނެ ކަމަށް ގަބޫލު ކުރައްވާ ކަމަށް އަބްދުއްރަހީމް ވިދާޅުވި އެވެ.

"އެއީ ފްލައިޓާ ބެހޭ ހުރިހާ އެއްޗެއް ރައްކާ ކުރާ އެއްޗަކީ ކަޅު ފޮށި. އެހެންވީމަ މި ތަހުގީގުގައި ވަރަށް ކުރިއެރުން ލިބިފައި މިއޮތީ. ކަޅު ފޮށި ލިބުނީމަ، މުޅި އެތީގެ މުހިންމު މައުލޫމާތު ލިބުނީ،" އަބްދުއްރަހީމް ވިދާޅުވި އެވެ.

މިވަރުގެ ބަޣާވާތެއް ހިނގައިގެން އުޅޭއިރު ރާއްޖޭގައި ހިނގަމުން އަންނަ ތަރައްގީގެ މަޝްރޫއުތަކަށް ވެސް ހުއްޓުމެއް އަންނާނެ ކަމަށާއި އެކަމުގެ ސަބަބުން ގެއްލުން ލިބޭނީ ރައްޔިތުންނަށް ކަމަށް ވެސް އަބްދުއްރަހީމް ވިދާޅުވި އެވެ. އެކަމަކު، "މުސްކުޅިއެއްގެ އަނގައިގައި ހުންނަ ދަތް ވެއްޓޭހެން" މި ސަރުކާރު ވައްޓާނުލެވޭނެ ކަމަށާއި ސަރުކާރު އޮތީ ވަރަށް ބަދަހިކޮށް ކަމަށް ވެސް އަބްދުއްރަހީމް ވިދާޅުވި އެވެ.

އަބްދުއްރަހީމް ވަނީ އިދިކޮޅު ފަރާތްތަކުން މާލޭގައި ބާއްވާ މުޒާހަރާގައި އެކަކުވެސް ބައިވެރިނުވުމަށް ގޮވާލައްވައިފަ އެވެ. ރަށްރަށުން މީހުން މާލެ އަތުވެއްޖެ ނަމަ، އެމީހުން މަގުމަތިވާނެ ކަމަށް އޭނާ ވިދާޅުވި އެވެ.

އަބްދުއްރަހީމް ވިދާޅުވި ގޮތުގައި މުޒާހަރާގައި "ހަތިޔާރަކަށް" ހަދާނީ ރަށްރަށުން އަންނަ މީހުންނެވެ. އަދި އާހިރު ނަތީޖާއަކަށް ވާނީ ކޮންމެވެސް ކަހަލަ ކުށަކަށް އަރައިގަނެވިގެން ބަންދުވުން ކަމަށް އޭނާ ވިދާޅުވި އެވެ. އެ ހާލަތަށް ނުގޮސް، ކެތްތެރިކަމާއެކު ރައްޔިތުން ތިބުމަށް އޭނާ ގޮވައިލެއްވި އެވެ.

ސުޕްރިންޓެންޑެންޓް އޮފް ޕޮލިސް އަހުމަދު ޝިފާން ނޫސްވެރިންނާ ބައްދަލުކުރައްވައި ރޭ ވިދާޅުވީ، އަލީ ހަމީދަށް ނިސްބަތްވާ ދަބަހަކުން 215،000 ޔޫއެސް ޑޮލަރާއި 150،000ރ. ފެނުނު ކަމަށެވެ. އެއީ ޖުމްލަ 3.4 މިލިއަން ރުފިޔާ އެވެ.

މީގެ އިތުރުން ފަނޑިޔާރުންނަށް ނުފޫޒު ފޯރުވަން، މައުމޫންގެ ދަރިކަލުން އަދި ދިއްގަރު ދާއިރާގެ މެމްބަރު އަހުމަދު ފާރިސް މައުމޫން މަސައްކަތް ކުރައްވާފައިވާކަން، އެންދެރިމާގެ އިން ނެރިގެން ގެންދިޔަ ފޮށިން ލިބުނު ޑޮކިއުމެންޓް އެވިޑެންސްތަކުން އެނގޭ ކަމަށް ޝިފާން ވިދާޅުވި އެވެ.

ޝިފާން ވިދާޅުވީ އެ ފޮށި ފެނިފައި ވަނީ، މައުމޫންގެ އޮފީހުގައި މަސައްކަތް ކުރާ ނަޖުމާ އިބްރާހިމްގެ ގެއިން ކަމަށެވެ. ނަޖުމާ ވަނީ މީގެ ކުރިން ހައްޔަރުކޮށްފަ އެވެ.

އިތުރަށް.. »

ގެއްލުނު ރޭ ފެނުނު އާދަޔާ ޚިލާފު ކަމެއް މީހަކު މިއަދު ކިޔައިދީފި

ރިޟްވާނު ދިރުއުޅުނު ގެކައިރިން ގަދަކަމުން މީހަކު ކާރަކަށް އަރުވައިގެން ގެންދިޔަ މަންޒަރު ފެނުނުކަމަށް ކްރިމިނަލް ކޯޓުގައި މިއަދު ހެކިބަސްދިން ބައެއް މީހުން ބުނެފިއެވެ.
ދެހާސް ސާދަ ވަނަ އަހަރުގެ އޮގަސްޓް ހަތް ވަނަ ދުވަހުގެ ރޭ ރިލްވާން ގަދަކަމުން ކާރަކަށް އަރުވައިގެން ގެންގޮސް ފޮރުވި ކަމަށް ބުނެ، ޓެރަރިޒަމްގެ ދައުވާ ދައުލަތުން އުފުލާފައިވަނީ ހ. ހިލްޓަން އަހުމަދު އާލިފް ރައޫފާއި ގދ. ވާދޫ ކަރަންކާގޭ، މުހައްމަދު ނޫރައްދީނާއި ސ. ހުޅުދޫ އަތިރީއާގޭ، މުހައްމަދު ސުއައިދުގެ މައްޗަށެވެ. އެ ތިން މީހުންގެ ތެރެއިން ސުއައިދު ރާއްޖޭގައި ނެތުމުން އޭނާގެ ޝަރީއަތް ކުރިއަކަށް ނުގެންދެއެވެ.

ތިން މީހުން ވެސް އެ ދައުވާއަށް އިންކާރުކޮށްފައިވާއިރު މިއަދު އޮތީ ދައުލަތުން ހުށަހަޅާ 29 ހެކިންގެ ތެރެއިން ސިއްރުން ހުށަހަޅާ ހަތް ހެކީގެ ތެރެއިން ހަތަރު މީހެއްގެ ހެކިބަސް ނެގުމެވެ.

މިއަދު ހެކިބަސް ނެގި ހަތަރު މީހެއްގެ ތެރެއިން ދެ މީހަކު ވަނީ ރިލްވާނު ގަދަކަމުން ކާރަކަށް އެރުވި މަންޒަރު ފެނިފައިވާ ކަމަށް ބުނެ ހެކިބަސްދީފައެވެ. ދެ މީހުން ވެސް ބުނެފައިވަނީ ދަންވަރު 1:30 އާއި 2:00 ދެމެދުގެ ވަގުތެއްގައި ރިލްވާން ދިރިއުޅުނު ގެ ކައިރިން މީހަކު ހަޅޭލައްވާ އަޑަށް ބެލްކަންޏަށް ނިކުތްއިރު ގަދަކަމުން މީހަކު ކާރަކަށް އަރުވައިގެން ދިޔަ ތަން ފެނުނު ކަމަށެވެ.

"އަނގަމަތީގަ އަތް އެޅީމަ ހަޅޭއްލަވާ ގޮތަށް އަޑެއް އިވުނީމަ ބެލްކަންޏަށް ނިކުތްއިރު މީހަކު ކާރަކަށް އަރުވަނީ. ކާރަށް އަރުވައިގެން ނައްޓާލި އިރު ދޮރު ވެސް ހުރީ ހުޅުވިފަ،" އަޑު ބަދަލުކޮށްގެން ސިއްރުން ހެކިބަސް ދިން މީހަކު ބުންޏެވެ.

އަދި އެވަގުތު ފުލުހުންނަށް ރިޕޯޓު ކުރި ކަމަށް ވެސް އެކަކު ބުންޏެވެ. ފުލުހުންނަށް ރިޕޯޓް ކުރިތާ ވިއްސަކަށް މިނެޓް ފަހުން ފުލުހުން އެ ސަރަހައްދަށް އައިސް އެ ތަން ބެލިބެލުމުން ވަޅިއެއް ފެނުނު ކަމަށް ހެކިބަސް ދިން މީހަކު ކިޔައިދިނެވެ. އަދި އެ ވަޅި ފުލުހުން ވަނީ ހެއްކެއްގެ ގޮތުގައި ގެންގޮސްފައެވެ.

މިއަދު ހެކިބަސް ދިން ހަތަރު މީހުނަށް ވެސް ކާރަކަށް އެރުވީ ސީދާ ރިލްވާން ކަމެއް އަދި އެކަން ކުރީ ކޮންބައެއް ކަމައް ބުނާކަށް ނޭންގުނެވެ.
ވީނުވީއެއް ނޭންގި ގެއްލިފައިވާ މިނިވަން ނޫހުގެ ނޫސްވެރިޔާ އަހްމަދު ރިލްވާން  އަބްދު ﷲ ގެއްލުނު ރޭ އޭނާގެ ކިބައިން ފެނުނު އާދަޔާ ޚިލާފު ކަމެއް މީހަކު މިއަދު ކިޔައިދީފިއެވެ.

އިތުރަށް.. »

ހައި ވޮލްޓޭޖު ކޭބަލް އެޅުމުގެ މަސައްކަތް ޗައިނާގެ،ޑީއީސީ ހަވާލު ކޮށްފި.

މާލެއާއި ހުޅުލެ އަދި ހުޅުމާލޭގައި ދެމުން ގެންދާ ކަރަންޓު އެއް ވިއުގައަކުން ގުޅާލުމަށްޓަކައި އަޅާ ހައި ވޮލްޓޭޖު ކޭބަލް އެޅުމުގެ މަސައްކަތް، ޗައިނާގެ ޑޮންފަން އިލެކްޓްރިކް އިންޓަނޭޝަނަލް ކޯޕަރޭޝަން (ޑީއީސީ)އާ ރަސްމީކޮށް ހަވާލުކޮށްފިއެވެ.
ގްރޭޓަރ މާލެ އޭރިއާގެ ކަރަންޓު ގްރިޑުތައް އެއް ވިއުގައަކުން ގުޅާލުމަށްޓަކައި، 7ކިލޯމީޓަރު ދިގު 132 ކިލޯވޮޓުގެ ހައި ވޮލްޓޭޖު ކޭބަލެއް މި ދެމެދުގައި އެޅިގެން ދާނެއެވެ. މި ކޭބަލް އަޅާނީ ޗައިނާ މޯލްޑިވްސް ފްރެންޑްޝިޕް ބްރިޖު މެދުވެރިކޮށެވެ. މި ޕްރޮޖެކްޓުގެ އަގަކީ 44.46 މިލިޔަން ޑޮލަރެވެ.

ޑީއީސީއަކީ ހުޅުމަލޭގައި ކުރިއަށްދާ ސްޓެލްކޯގެ ފިފްތު ޕަވަރ ޕްރޮޖެކްޓްވެސް ހިންގަމުންދާ ކުންފުންޏެވެ.

ރަސްމިއްޔާތުގައި ވާހަކަ ދައްކަވަމުން ސްޓެލްކޯގެ މެނޭޖިންގް ޑިރެކްޓަރު އަލްފާޟިލް އަހްމަދު ޒުހޫރު ވިދާޅުވީ ފިފްތު ޕަވަރ ޕްރޮޖެކްޓް ހިންގާ ކުންފުންޏަށް ކޭބަލް އަޅަން ލިބުމަކީ މަސައްކަތް ރަނގަޅަށް ކުރަން ލިބޭ ރަނުގެ ފުރުސަތެއް ކަމަށެވެ.

އިތުރަށް.. »

ޔާމީން މަގާމުން ވަކިކޮށްދޭން އެދި ހުށަހެޅި މައްސަލަ ބަލައެއް ނުގަނޭ

ރައީސް އަބްދުﷲ ޔާމީން އަބްދުލްގައްޔޫމު މަގާމުން ވަކޮކޮށްދިނުމަށް އެދި އިދިކޮޅު ލީޑަރުންގެ ފަރާތުން ސުޕްރީމް ކޯޓަށް ހުށަހެޅި މައްސަލަ ބަލައި ނުގަންނަން އެ ކޯޓުން ނިންމައިފި ކަމަށް ކޯޓުގެ ވެބްސައިޓުގައި ވަނީ އެމައްސަލަ ބަލައި ނުގަންނަން ނިންމިކަން އާންމުކޮށް އިއުލާނުކޮށްފަ އެވެ.

މައްސަލަ ބަލައި ނުގަންނަން ނިންމި ސަބަބެއް ކަމަށް ސުޕްރީމް ކޯޓުން ބުނެފައިވަނީ ގާނޫނު އަސާސީގެ 113 ވަނަ މާއްދާގައި ބުނެފައިވާ ގޮތަށް ހުށަހަޅާފައިވާ މައްސަލަ އަކަށް ނުވާތީ ކަމަށެވެ.

ގާނޫނުއަސާސީގެ 113 ވަނަ މާއްދާގައި ބުނެފައިވަނީ ރައީސުލްޖުމްހޫރިއްޔާ ވަކި ކުރުމުގެ މައްސަލައެއް ސުޕްރީމް ކޯޓަށް ހުށަހެޅޭނީ ރައްޔިތުންގެ މަޖިލީހުން އެގޮތަށް ނިންމުމުން އެކަމާ ހިލާފު އުފެދިއްޖެ ހާލަތެއްގައި ކަމަށެވެ. އަދި އެފަދަ މައްސަލައެއްގައި ނިންމުންތައް ނިންމަން ވާނީ ސުޕްރީމް ކޯޓުގައި ތިއްބަވާ ހުރިހާ ފަނޑިޔާރުން ތިބެގެންނެވެ.

އެހެންވެ އެމައްސަލަ ބަލައި ނުގަންނަން ސުޕްރީމް ކޯޓުގެ ފަނޑިޔާރުންގެ މަޖިލީހުގެ އިއްޔެ ނިންމާފައިވާ ކަމަށް އެ ކޯޓުން ބުންޏެވެ.

އިތުރަށް.. »

އިންޑިއާއިން މަންޒަރު ބަލަން އޮވެގެން ނުވާނެ: ޔަޝްވާންތު

މިހާރު ޗައިނާއިން ރާއްޖޭގައި ބާރުގަދަ ކުރަމުންދާ އިރު އިންޑިއާއިން މަންޒަރު ބަލާލަން އޮވެގެން ނުވާނެ ކަމަށް އިންޑިއާގެ ވެރިކަން ކުރާ ބަރަތިޔާ ޖަނާތާ ޕާޓީ (ބީޖޭޕީ)ގެ މަޖިލިސް މެމްބަރެއް ކަމަށްވާ ޔަޝްވާންތު ސިންގހާ ވިދާޅުވެއްޖެ އެވެ.
ނޫސްވެރިން ކުރެއްވެވި ސުވާލުތަކަށް ޖަވާބު ދެއްވަވަމުން ސިންހާ ވިދާޅުވި ގޮތުގައި ރާއްޖޭގެ މައްސަލަ ހައްލު ކުރުމަށް އިންޑިއާއަށް އެޅި ދާނެ ޑިޕްލޮމެޓިކް އަދި ޑިޕްލޮމެޓިކް ނޫން ފިޔަވަޅުތައް އެބަހުއްޓެވެ. މިފަދަ ހާލަތެއްގައި އިންޑިއާއިން އަމަލު ކުރަން ޖެހޭނީ އެގައުމުގެ ސަލާމަތަށް އޮތް އެންމެ ރަނގަޅު ގޮތަކަށް ކަމަށް ސިންހާ ވިދާޅުވި އެވެ.
ސިންހާ ވިދާޅުވި ގޮތުގައި ބައެއް ރިޕޯޓުތަކުގައިވާ ގޮތުން ޗައިނާއިން މިހާރު ވަނީ ރާއްޖޭގެ 18 ވަރަކަށް ރަށަށް ވެރިވެގަނެފަ އެވެ. އަދި އެއީ ވަރަށް ކަންބޮޑުވާން ޖެހޭ ކަމެއް ކަމަށާއި ޗައިނާއިން "ގޭމުތައް ކުޅެމުން ދަނީ އިންޑިއާގެ ބިއްދޮށުގައި" ކަމަށް އޭނާ ވިދާޅުވި އެވެ.

މީގެ އިތުރުން ސިންހާ ވަނީ ރާއްޖޭގެ ގިނަ އަދަދެއްގެ މީހުން އައިއެސްއާ ގުޅޭ ކަމަށާއި އެމީހުން އެނބުރި ގައުމަށް ދިޔުމުން، އެވާނީ އިންޑިއާގެ ސަލާމަތަށް އޮތް ނުރައްކަލަކަށް ކަމަށް ވިދާޅުވެފަ އެވެ.

އިތުރަށް.. »

އަލީ ހަމީދުގެ ދަބަހަކުން ލައްކަ ބައިވަރު ރުފިޔާ ފެނިއްޖެ

ސުޕްރީމް ކޯޓުގެ ފަނޑިޔާރު އަލީ ހަމީދަށް ނިސްބަތްވާ ދަބަހެއްގެ ތެރެއިން ތިން މިލިއަނަށް ވުރެ ގިނަ ރުފިޔާ އާއި ޑޮލަރު ފެނިފައިވާ ކަމަށް ފުލުހުން ބުނެފި އެވެ.
އަލީ ހަމީދަށް ނިސްބަތްވާ ދަބަހަކުން ދެ ލައްކަ ފަނަރަ ހާސް ޑޮލަރާއި އެއް ލައްކަ ފަންސާސްހާސް ރުފިޔާ ފެނިފައި. މީގެ އިތުރުން އަލީ ހަމީދުގެ އާއިލާ އަށް ކުރީގެ ރައީސް މައުމޫން ތަފާތު އެކި ގޮތްގޮތުން އެހީވަމުން އަންނަ ކަމަށް ތަހުގީގަށް ވަނީ ޔަގީން ކުރެވިފައި." ޝިފާން ވިދާޅުވި އެވެ.
"އަލީ ހަމީދު ރިޝްވަތުގެ ފައިސާ ބޭނުން ކޮށްގެން ފްލެޓެއް ގަނެފައިވާ ކަމުގެ ކިތާބީ ހެކި ޔަގީން ކުރެވޭ ވަރަށް ވަނީ ލިބިފައި. ރާއްޖޭގައި ވިޔަފާރިކުރަމުން އަންނަ ބިޔަ ކުންފުންޔަކުން 2.4 މިލިއަން ޑޮލަރުގެ ލޯނު އެހީ އަލީ ހަމީދަށް ދީފައިވާކަމުގެ ކިތާބީ ހެކި ވަނީ ޔަގީންވާ ވަރަށް ލިބިފަ." ޝިފާން ވިދާޅުވި އެވެ.

ޝިފާން ވިދާޅުވީ އިތުރަށް ވިދާޅުވީ އަލީ ހަމީދުގެ އާއިލާއަށް ތަފާތު އެކި ގޮތްގޮތުން ކުރީގެ ރައީސް، މައުމޫން އަބްދުލްގައްޔޫމް އެހީތެރިވަމުން އަންނަ ކަމަށް ތަހުޤީޤަށް ޔަގީންވެފައިވާކަމަށެވެ.

އަލީ ހަމީދަށް ކުރެވޭ ތުހުމަތުތަކަކީ ރިޝްވަތުގެ ފައިސާ ހިފައި ގާނޫނީ ސަރުކާރު ގާނޫނާ ހިލާފަށް ވައްޓާލަން މަސައްކަތް ކުރިކަމުގެ ތުހުމަތެވެ. މި މައްސަލައާ ގުޅިގެން ޖޭއެސްސީ އިން ވަނީ އޭނާ ސަސްޕެންޑުވެސް ކޮށްފަ އެވެ.

އަލީ ހަމީދު ހައްޔަރު ކޮށްފައި ވަނީ ކުއްލި ނުރައްކަލުގެ ހާލަތު އިއުލާނު ކޮށްފައިވަނިކޮށް މިދިޔަ ހަފްތާގެ ހޯމަ ދުވަހުގެ ރޭގެ ވަގުތެއްގައި ސުޕްރީމް ކޯޓު ތެރޭގައި ހުންނަވަނިކޮށެވެ. އަލީ ޙަމީދާ އެކު އުއްތަމަ ފަނޑިޔާރު އަބްދު ﷲ ސައީދު ވެސް ވަނީ ހައްޔަރު ކޮށްފަ އެވެ.

އިތުރަށް.. »

މިޔަންމާގެ އެތައް ހާސް މުސްލިމުންނެއް މަރާލި މައްސަލައިގައި، ފިޔަވަޅު އެޅުމަށް ނިންމާފައިވާ ކަމަށް ބައިނަލްއަޤުވާމީ މީޑިޔާތަކުން ބުނެފި

މިޔަންމާގެ ރަޚައިން ސްޓޭޓުގެ ރޮހިންޖާ ދަރިކޮޅުގެ އެތައް ހާސް މުސްލިމުންނެއް މަރާލި މައްސަލައިގައި، ފިޔަވަޅު އެޅުމަށް ނިންމާފައިވަނީ، އެޤައުމުގެ އެންމެ ހަތް ސިފައިންގެ އޮފިސަރުންނަށްކަމަށް ބައިނަލްއަޤުވާމީ މީޑިޔާތަކުން އާދީއްތަ ދުވަހު ބުނެފިއެވެ.

އެޤައުމުގެ ލާއިންސާނީ ސަރުކާރުގެ ތަރުޖަމާނު، ޒޯ ޓޭ އާ ހަވާލާދީ "އަލްޖަޒީރާ" އިން ބުނެފައިވަނީ އަސްކަރިއްޔާއިން ހިންގި ތަޙުޤީޤަށް ފަހު ފިޔަވަޅު އަޅަން ނިންމާފައިވަނީ ހަތް ސިފައިންގެ މީހުންނާއި، ތިން ފުލުސް އޮފިސަރުން އަދި ހަ އާއްމު ބުޑިސްޓުންގެ މައްޗަށްކަމަށެވެ. އަދި، އެމީހުންގެ މައްޗަށް އަޅަނީ ޤާނޫނުގައި ކަނޑައެޅިފައިވާ އަދަބުކަމަށްވެސް އޭނާ ބުނެފައިވެއެވެ.
މި އަނިޔާވެރި ޢަމަލުތަކުން ސަލާމަތްވުމަށް، ގިނަ އަދަދެއްގެ މީހުން އަވަށްޓެރި ބަނގުލަދޭޝް އަށް ހިޖުރަކޮށްފައިވެއެވެ. ބޯޓުފަހަރުގައި އެމީހުން އެޤައުމަށް ހިޖުރަކުރިއިރު، އަދިވެސް އެމީހުން ދިރިއުޅެމުންދަނީ ބަނގުލަދޭޝްގެ ކޮކްސް ބާޒާރުގައެވެ.

މިދިޔަ އަހަރުގެ އޯގަސްޓު މަހުން ފެށިގެން، ރޮހިންޖާ މުސްލިމުންނާ ދެކޮޅަށް އެތައް އަނިޔާވެރި ލާއިންސާނީ ޢަމަލުތަކެއް، މިޔަންމާގެ ސިފައިންނާއި ބުޑިސްޓުން ހިންގާފައިވާކަން ކަށަވަރުވެއެވެ. އެގޮތުން، ގޭގޭގައި ހުޅު ޖަހާ އަންދާލުމާއި، އަންހެނުންގެ އިއްފަތްތެރިކަން ފޭރިގަތުން އަދި ކުޑަކުދިންނާއި އެނޫންވެސް މީހުންގެ ގަޔަށް ބަޑި ޖަހާ މަރާލުން ހިމެނެއެވެ.



ޚަބަރުތައް ބުނާގޮތުން، އިނގިރޭސިވިލާތުގެ ފޮރިން ސެކެރެޓަރީ ބޮރިސް ޖޯންސަން ވަނީ މިޔަންމާގެ އަނިޔާވެރި އަން ސަން ސޫ ކީއާ އިއްޔެ ބައްދަލުކޮށް، ރޮހިންޖާ މުސްލިމުން އަލުން މިޔަންމާއަށް ގެނެވޭނެ ގޮތަކާމެދު މަޝްވަރާކޮށްފައެވެ.

އިތުރަށް.. »

ރަންވޭގައި އެސްފޯލްޓް އެޅުމުގެ މަސައްކަތް މި މަހުގެ ތެރޭގައި ފަށާނެ-- އެމްއޭސީއެލް

ރަންވޭގައި އެސްފޯލްޓް އެޅުމުގެ މަސައްކަތް މި މަހުގެ ތެރޭގައި ފަށާނެ ކަމަށް އެމްއޭސީއެލްގެ ޖެނެރަލް މެނޭޖަރ ކޯޕަރޭޓް ކޮމިއުނިކޭޝަންސް ހަސަން އަރީފް ވިދާޅުވެއްޖެއެވެ.
އެމްއޭސީއެލްގެ ފަރާތުން  ވެލާނާ އެއާޕޯޓުގެ އާ ރަންވޭގެ މަސައްކަތްތައް މިހާރު ކުރިޔަށް ގޮސްފައިވާ ހިސާބު ދައްކައިދޭ ފޮޓޯތަކެއް މިއަދު ވަނީ، އާންމުކޮށްފައެވެ.
ހުޅުލޭގައި ހުންނަ ވެލާނާ އިންޓަނޭޝަނަލް އެއާޕޯޓުގައި އަޅަމުންދާ އާ ރަންވޭއަކީ 3.4 ކިލޯމީޓަރު ދިގު، އަދި 60 މީޓަރު ފުޅާ ރަންވޭއެކެވެ. ރަންވޭ އެޅުމުގެ މަސައްކަތް ކުރަނީ (ބީޔޫސީޖީ) ޗައިނާގެ ބެއިޖިންގް އާބަން ކޮންސްޓްރަކްޝަން ގްރޫޕުންނެވެ. 

އިތުރަށް.. »

ރާއްޖެ ޓީވީ އަލުން ފަށަނީ؟؟!!

ރާއްޖެ ޓީވީގެ ބްރޯޑްކާސްޓިންގް ޚިދުމަތް މެދުކަނޑާލާފައި ވަނީ، ރާއްޖޭގެ ގައުމީ ސަލާމަތަށް ނުރައްކާވާ ފަދަ މަޢުލޫމާތާއި ކޮންޓެންޓް ހާމަކުރާ ފަރާތްތަކާ މެދު އިތުރު އިންޒާރެއް ދިނުމެއްނެތި ފިޔަވަޅު އަޅަމުންގެންދާނެ ކަމަށް މޯލްޑިވްސް ނޭޝަނަލް ޑިފެންސްފޯސް އިން އަންގާފައި ވަނިކޮށް ބުރާސްފަތި ދުވަހުގެ ރެއެ އެވެ.

ރާއްޖެ ޓީވީ އަލުން ފަށަން ނިންމާފައިވާކަން އިއުލާން ކުރަމުން އެ ސްޓޭޝަނުން ނެރުނު ނޫސްބަޔާނެއްގައި ބުނެފައި ވަނީ އަލުން ހިދުމަތް ފަށަން ނިންމީ ގިނަ ބައެއްގެ އެދުމުގެ މަތިން ކަމަށެވެ. އަދި ހިދުމަތް ފެށުމުގެ ކުރިން އަމާން ރައްކާތެރި މާހައުލެއް ހޯދުމަށް ބޯރޯޑްކާސްޓިންގް ކަމިޝަނާއި ފުލުހުންނާއި ސިފައިންގެ ފަރާތުން އެދިފައިވާނެ ކަމަށެވެ. ނަމަވެސް "އެކަށީގެންވާ ޖަވާބެއް އެއްވެސް މުވައްސަސާއަކުން ލިބިފައިނުވާކަމަށް" އެ ސްޓޭޝަންގެ ބަޔާނުގައި ވަނީ ބުނެފަ އެވެ.

ޑިފެންސް މިނިސްޓްރީން ބުރާސްފަތި ދިވަހު ނެރުނު ނޫސް ބަޔާނެއްގައި ބުނެފައި ވަނީ، ތަފާތު ވަޞީލަތްތައް މެދުވެރިކޮށް ފަތުރާ މައުލޫމާތާއި ވަގުތުން ދުރަށް ފޮނުވަމުންގެންދާ ޕްރޮގްރާމްތަކުގައި ދިވެހި ލޮބުވެތި ރައްޔިތުންގެ މެދުގައި ބިރުވެރިކަން އުފައްދައި، ގައުމުގެ އަމަންއަމާންކަން ގެއްލޭ ފަދަ ގޮތްގޮތަށް، މައުލޫމާތު ފަތުރަމުންދާކަން ފާހަގަކުރެވިފައިވާ ކަމަށެވެ.

އެ މިނިސްޓްރީން ބުނެފައި ވަނީ އެ ފަދަ ކަންކަމަކީ ކަންބޮޑުވާ ކަންކަމަށާއި އެހެން ކަމުން އެފަދަ ގައުމީ ސަލާމަތާއި އަދި ސިފައިންގެ ވާޖިބަށް ހުރަސް އެޅޭ މައުލޫމާތު ފެތުރުން ވަގުތުން ހުއްޓާލުމަށް ނަސޭހަތްތެރިވެ އިންޒާރުދޭ ކަމަށެވެ.

"ރާއްޖޭގެ ގައުމީ ސަލާމަތަށް ނުރައްކާވާ ފަދަ މަޢުލޫމާތާއި ކޮންޓެންޓް ހާމަކުރާ ފަރާތްތަކާ މެދު އިތުރު އިންޒާރެއް ދިނުމެއް ނެތި ފިޔަވަޅު އަޅަމުންގެންދާނެކަން އަންގަން،" ޑިފެންސްގެ ބަޔާނުގައި ބުނެފައިވެ އެވެ.

.

އިތުރަށް.. »

ތި ކަމުގައި ކޮންމެވެސް ހެޔޮކަމެއް ވާނެއެވެ

 ރަސްކަލަކު އެއްދުވަހެއްގައި ކަނަމަދު ފަޅަން އުޅެނިކޮށް
 ކަތިވަޅިން ޖެހި އިނގިލި ބުރިވެއްޖެއެވެ. މިތަން ދެކެފައި
 ވަޒީރު ބުންޏެވެ. ތި ކަމުގައި ކޮންމެވެސް ހެޔޮކަމެއް
 ވާނެއެވެ. ރަސްގެފާނު މިކަމާ ކޯފާ އިސްކުރައްވައި
 ވަޒީރު ޖަލަށް ލައިފިއެވެ. ދުވަސްތައް ފާއިތުވަމުން ދެއެވެ.
 އެއްދުވަހަކު މަގުފޭރޭ ޤާފިލާއެއް ސަހަރާ ދިމާއަށް އަންނަ
 ވާހަކަ ޖާސޫސީންގެ ފަރާތުން ރަސްގެފާނަށް ޚަބަރު ދީފިއެވެ.
 އެކަމަށްޓަކައި ކުރާނެ ނުކުރާނެ ކަމެއް ނޭނގިގެން އުޅެނިކޮށް
 އެބައިމީހުން ސަހަރުގެ ކޯއްޓޭތައް ވަށާލައިފިއެވެ. އެމީހުންގެ
 ފަރާތުން މީހަކު ރަސްގެފާނުގެ ދަރުބާރަށް ގޮސް ދެންނެވިއެވެ.
 އަހަރެމެންގެ ލަޝްކަރުގެ ބިޔަކަމާއި ޢަދަދުގެ ގިނަކަން ތިބާ
 ދެކޭނޫއެވެ. ހަނގުރާމަ ކުރާން ބޭނުން ނޫންނަމަ ރަށްބޭރަށް
 ނިކުންނާންވީއެވެ. ނޫންނަމަ އެންމެން ބަނޑަށް ޖެހެންދެން
 ޙިސާރުގައި ތިބޭށެވެ. ރަސްގެފާނު ބޭނުން ވީ ހިސާރުގައި
 ތިބުމަށެވެ. ދެތިން މަސްދުވަހަށް ވީތަނާ ޝަހަރުން ކާބޯތަކެތި
 ހުސްވެ ބަނޑަށް ޖެހިއްޖެއެވެ. ރަސްގެފާނުގެ ފަރާތުން މީހަކު
 ފޭރޭމީހުންގެ އަރިހަށް އައިސް ރަށުން ފައިބައިގެން އަމާން
 ކަމުގައި ދިޔުމަށް ހުއްދައަށް އެދުމުން، އެމީހުންގެ ނިންމުމަކަށް
 ވީ، ނުކުޅެދުންތެރިކަން ހުރި މީހެއް ވާނަމަ ޤަތުލު ނުކޮށް
 ދޫކޮށްލުމަށެވެ. އެގޮތާއި ރުހި އެންމެން ރަށްބޭރަށް ނުކުމެ
 ހިއްސުތައް ސަލާމަތުން ހުރި މީހެއް ވިއްޔާ ޤަތުލުވެ
 ނުކުޅެދުންތެރިކަމެއް ހުރި މީހެއް ނަމަ ސަލާމަތް ވެއްޖެއެވެ.

އިތުރަށް.. »

ޅ. ނައިފަރުގެ ދޯންޏަކުން މާވަހަރެއް ހޮވޭފޫ

. ޅ. ނައިފަރުގެ ދޯންޏަކުން މާވަހަރެއް ކަމަށް ބެލެވޭ އެއްޗެއް ހޮވައިފި އެވެ

ކ. ގުޅީ ކަންނެލި މަސްވެރިކަން ކުރާ "ލަޝްކަރު" ކިޔާ ދޯނި ވެސް މިދިޔަ ހަފުތާގޭ މާވަހަރެއް ކަމަށް ބެލެވޭ އެއްޗެއް ހޮވޭފޭވަނިކޮށް ނައިފަރު ދޯނިން މިހޮވީ ކޮންފަދަ އެއްޗެއް ކަމެއް ނޭނގެއެވެ.

މާވަހަރު ފެނެފޭ ވަނީ ނައިފަރަށް ނިސްބަތްވާ 'ފްރެޝް 4' ދޯންޏަށެވެ. އެ ދޯނީގެ ފަޅުވެރިއަކު މިއަދު ގުޅޭލީމާ ބުނީ "މާވަހަރެއް ކަމަށް ހީވާ އެއްޗެއް ހޮވޭފޭ އިބައޮތް ކަމަށާއި ބޮޑަށް ބެލެވެނީ އޭ ހުދަންބަރެއް" ކަމަށެވެ

އިތުރު ތަހުލީލު ތަކާ ޓެސްޓްތަކެއް ހެދުމަށް މިއަދު "ހުދަންބަރު" ރާއްޖޭން ބޭރަށް ލަންކާ އަށް ފޮނުވާނެ ކަމަށާއި މާވަހަރު ކިރި އިރު އޭގައި ހަތް ކިލޯ ދުއިސައްތަ ވިހި ގްރާމް ހުރި ކަމަށް ފަޅުވެރިޔާ ބުންޏެވެ.

"މާވަހަރު" ވިއްކާލާނެ އަގު އަދި ކަނޑައަޅާފައި ނުވާ ކަމަށާއި "ހުދަންބަރު"ގެ އިތުރު ތަހްލީލްތަކެއް ހެދުމަށް ފަހު ވިއްކާލާނެ އަގު ކަނޑައަޅާނެ ކަމަށް ވެސް އޭނާ ބުންޏެވެ

.:ނައިފަރު އަޕްޑޭޓް ނިއުސް:.

 ޖމލ

އިތުރަށް.. »

ކަހަނބުގެ ސިގްނަލް ގެއްލިއްޖެ..!

މެރިން ރިސާޗް ސެންޓަރަކީ ރާއްޖޭގެ ކަނޑުގެ ދިރުމާއި ބެހޭ އެކި ކަހަލަ މައުލޫމާތު އެއްކޮށް، އެފަދަ ރިސާރޗް ތައް ކުރަމުން ތިޔަ ސަރުކާރުގެ މުއައްސަސާއެކެވެ. ރާއްޖޭގެ ކަނޑުތަކުގައި ދިރިއުޅޭ މަސް މަހާ މެއްސާއި އެކި ވައްތަރުގެ ގާގަލާ ގެލީގެ މައުލޫމާތުގެ އިތުރުން ކަނޑުތެރެއިން ފެންނަ އެކިވައްތަރުގެ އެއްޗެހީގެ މައުލޫމާތުވެސް އެއްކުރެއެވެ.

އެގޮތުން ކަނޑުބިލަމާހާއި ކަންނެލީގައި ފާހަގަ ޖަހާފާ ދޫކުރުމާއި ރާއްޖޭގެ ކަނޑުތަކުގައި ދިރިއުޅޭ ވެލައާއި ކަހަނބު މަދުވަމުން ދާކަން އިޙްސާސް ކުރެވެން ފެށުމުން، މެރިން ރިސަރޗް ސެންޓަރުގެ ބެލުމުގެ ދަށުން ކަހަނބެއްގައި ސެޓެލައިޓް ޓެގް ޖަހާފައި ދޫކުރެވުނެވެ. މި ކަމުގެ ބޭނުމަކީ ވެލައާއި ކަހަނބު ރާއްޖޭގެ އެކި ސަރަހައްދު ތަކަށް ގޮސް އުޅޭ މިންވަރު ބެލުމެވެ. މި ޓެގް ހަރުކުރެވިފައިވަނީ ކަހަނބުގެ ބުރަކަށި މަތީގައި ކަމުން، ނޭވާލުމަށް މައްޗައް އަރާ ކޮންމެ ފަހަރަކު އާއި، އެއްގަމުގައި އޮތަސް ކޮންމެ 10 މިނެޓަކުން އޭތި އޮންނަ ސަރަހައްދެއް ސެޓެލައިޓް މެދުވެރިކޮށް މެރިން ރިސަރޗް ސެންޓަރ ގެ ސަރވަރއަށް މައުލޫމާތު ފޯރުކޮށްދެމުން ދެއެވެ.

ކަހަނބު ގައި ޓެގް ޖެހުމަށްފަހުދޫކޮށްލެވުނީ ސުނާމީ ބިނާ މިހާރު ހުންނަ ހިސާބުން 50މީޓަރ ބޭރުންނެވެ. ކޮންމެ 10 މެނަޓަކުން ކަހަނބު އުޅެމުންދާ ހިސާބު ގްރާފެއްގެ ސިފައިގައި ޑޭޓާ ބޭސްގައި ކުރެހެމުން ދިޔައެވެ. ޓީމުގެ މީހުން ވެސް ވަރަށް ފަރުވާތެރިކަމާއެކު ކަހަނބު އުޅެމުން ދާގޮތް ދޭތެރެއަކުން ބަލާލައެވެ. ނުވަތަ "ކޮބާ ކިހާ ހިސާބެއްގަ އެސޮރު އެއުޅެނީ" މިފަދަ ގޮތަކަށް ކަހަނބުގެ ފަހުގެ އަޕްޑޭޓެއް ލިބޭތޯ އަހާލައެވެ. މިކަމަށް ޑިއުޓީ ބަހައިގެން ބަޔަކު ތިބެއެވެ.

މިއަދަކީ ކަހަނބު ދޫކޮށްލިތާ ހަފްތާއެއް ވީ ދުވަހެވެ. ހަފްތާއެއްގެ ތެރޭގައި މާލޭގެ ވަށައިގެންވާ ފަރުގެ ގިނަ ސަރަހައްދަކަށާއި، ހުޅުލެއާއި ވިލިގިލި ފަދަ ސަރަޙައްދު ތަކުގައި މި ކަހަނބު އުޅެމުންދިޔަ ކަމަށް ގުރާފުން ދައްކައެވެ. އެގޮތުން އެސޮރު އެންމެ ގިނަ ވަގުތު ހޭދަކޮށްފައި ވަނީ ވިލިނގިލި އަތިރިމައްޗާއި ދިމާގައެވެ. މި ހުރިހާ މައުލޫމާތެއް މަސައްކަތުގެ ކޯޑިނޭޓަރާއި ހިއްސާ ކުރުމަށް ޓީމް ކުދިން ބައްދަލުވުމެއް ބޭއްވިއެވެ. އަދި މިކަމަށް ތައުރީފުގެ ބަސްތައް ކޯޑިނޭޓަރުގެ ފަރާތްޕުޅުން އޮހެމުން ދިޔައެވެ.

ޑިއުޓީގައި ކޮމްޕިއުޓަރުގެ ސްކްރީންއަށް ބަލަހައްޓައިގެން އިން މުރާދަށް ނިދިޖެހިލައި ހޭލެވުން އިރުން ގްރާފުން ފެންނަމުންދާ ފެހި ކުލައިގެ ތިކި ގެއްލިއްޖެއެވެ. ކުއްލި ގޮތަކަށް ކަހަނބުގެ ޚަބަރު ވުން ކެނޑިއްޖެއެވެ. ތިކި އެންމެ ފަހުން ދިއްލުނީ ވިލިނގިލި އަތިރި މައްޗާއި ދިމާއިން ކަމަށް ސްކްރީންއިން ފެންނަމުން ދިޔަ ގްރާފަށް ޒޫމް ކޮށް ލުމުން އެނުގުނެވެ. މުރާދު އަވަސް އަވަހަށް ގޮސް ޓީމުގެ ކޯޑިނޭޓަރަށް މި ވާހަކަ ދެންނެވިއެވެ.

މުރާދު: "ބައްލަވާ..! ކަހަނބުގެ ސިގްނަލް ގެއްލިއްޖެ..! މަރުވީ ކަންނޭނގެ.."

އެވާހަކަ އަޑު އިވުމާއެކު އެންމެން ހާސްވެއްޖެއެވެ.

ފަރީދު: "ސިގްނަލް ދިޔައީ އޭ.. މަރުވީ އޭ... ނުވާނެ އެހެނެއް.."

ފަތުހީ: " ތި ޖެހުނީ އަވަހަށް ތިކަން ބަލަން.."

ރަމީޒު: " ހިނގާ .. ހިނގާ... ތި ކަމެއް ވާނެ ބަލަން.."

މުރާދު ބުނީ ހަމަ ތެދެކެވެ. ކަހަނަބު ގެއްލުނީއެވެ. މި ކަމުގައި އެންމެން ކަންތައް ބޮޑުވެފައި ތިއްބައި މެންދުރު ވަގުތު ވުމުން ބްރޭކަށް ގޮސްފައި އައިރު މުރާދު މާ ވަރަކަށް ހިނި އައިސްފަ ހުއްޓާ ފެނިގެން ކިހިނެއް ވީތޯ އަހާލުމުން އަނެއްކާ ސިގްނަލް ލިބެން ފެށީ ކަމަށް ބުންޏެވެ. ހުރިހާ އެންމެން ވެސް ސްކްރީންއަށް ބަލަމުން ދެއެވެ. ވަރަށް ހައިރާން ކަމާއެކު އެކުއެވެ.

ކުރީގައި އެސޮރު އުޅެމުންދިޔަ މާހައުލު މުޅިންބަދަލުވެއްޖެއެވެ. އަދި މޫދުގައި ދުވާ ސްޕީޑް މާ ބާރުވެސް ވެއްޖެއެވެ. ގަޑިއަކު 12 މޭލު ބާރުމިނުގައި އެސޮރު އެބަ ދުވެއެވެ. ހައިރާންވެ އަންތަރީސް ވާ ކަމަކީ ވިލިނގިލިން ހަމަ ސީދާ ސީދަލަށް ގޮސް ތިލަފުއްޓަށް ދާތީއެވެ. އަދި އެއްވެސް އިތުރު ޙަރަކާތެއް ނެތި، އޮތުމަށްފަހު އަލުން ވިލިނގިއްޔަށް އަންނާތީއެވެ. މިގޮތަށް ކޮންމެ ދުވަހަކު އެބަ ދަތުރުކުރުކުރާކަމަށް ގްރާފުން ދައްކައެވެ. ހުކުރު ދުވަހު އެސޮރު މިއޮތީ ވިލިނގިލީގައެވެ. އެއްވެސް ތާކަށް ނުދެއެވެ. މިކަމާ ކަންތައްބޮޑުވެގެން އެންމެން ވާހަކަ ދައްކަން ފެށިއެވެ.

ފަތުހީ: "ކީއްވެބާ އަބަދު އެއްތާކަށް އެއްގަޑިއެއްގަ އެ ސޮރު އެދަނީ.."

މުރާދު: " ވިލިނގިލީގަ ނިދަނީ ކަންނޭގެ ދޯ.."

ރަމީޒު: " ހިނގާ މާދަމާ ޓްރޭޝަރ ހިފައިގެން އޭގެ ސިގްނަލް ބަލަން... ބަނދަރު އަތިރިމަތީ ދިމާގަ އޮތްކަމަށް ދޯ ޗާޓުން ދައްކަނީ.."

ރަމީޒުގެ މިނިންމުމަށް އެންމެން ތާއީދު ކޮށް އެސޮރު އެއޮތް ތަނެއް ހޯދުމަށް ބޭނުން ވިއެވެ.

ރަމީޒުގެ ޚިޔާލަށް އެންމެ ފަހުން ވިލިނގިއްޔަށް ދާން ނިންމިއެވެ. ޖެހިގެން އައި ހުކުރު ދުވަހު ހެނދުނު ވިލިނގިއްޔަށް ގޮސް ރާޑަރުން އޭގެ ސިގްނަލް ލޮކޭޓް ކުރަނިކޮށް އެދިމާލުގައި އަޅާފައި އޮތް މުދާ އުފުލާ ދޯންޏާއި ދިމާއިން އެލާމް ވެއްޖެއެވެ. ދެން އެ ދޯންޏަށް އެރުމުން ސިގްނަލް ސިންކްރޮނައިޒް ވެއްޖެއެވެ. އެހެން ކަމުން އެސޮރު އޮތް ތަނެއް ހޯދުމަށް އެ ދޯނީގައި ޖަހާފައި އިން ނަންބަރަކަށް ގުޅުމުން އޭގެ ކައްޕި އަތުވެއްޖެއެވެ.

ފަތުހީ: "އަޅުގަނޑުމެން މީ މެރިން ރިސަރޗް ސެންޓަރުން އިނގޭތޯ.."

ކައްޕި: "ލައްބަ.. ދޯނި ނަގަންވީތޯ.."

ފަތުހީ: " ނޫން.. ނޫން.. ދޯންޏަށް އަރަންވީ އަޅުގަނޑުމެން އެކީގަ.. މި ވެގެން އުޅޭ ގޮތް އެނގިލައްވާތޯ.."

ކައްޕި: "ނޫން.. ނޫން.. ހިންގަވާ..."

ފަތުހީ: "މި ދޯނީގަ އޮތް ކަހަނބު އަޅުގަނޑުމެންނާ ޙަވާލު ކުރަންވީ.."

ފަތުހީ މިހެން ބުނުމުން ކައްޕިއަށް އޮޅުން އެރިއެވެ.

ކައްޕި: "މަޑުކޮށްލާ... އެބަ އަންނަން..."

އިރުތަކެއް ވަންދެން ދޯނީގެ އެތަން މިތަން ހޭވުމަށްފަހު އައީ ބަތް އަޅާކަހަލަ ކަހަނބެއް ހިފައިގެންނެވެ.

ކައްޕި މި ގެނައި އެތި ފެނިފަ ފަތުހީ ރުޅިވެރިކަމާއެކު ބުންޏެވެ.

ފަތުހީ: " ސަމާސާ ކުރާކަށް ނޫން މިއައީ.. ދުރުވޭ އަޅުގަނޑުމެންނާ އެކީ ސިފައިންގެ އަށް ދާން.. އަޅުގަނޑުމެން މި ދަންނަވަނީ މޫދުގައި އުޅޭ ވެލާ ކަހަނބު ވާހަކަ އިނގޭތޯ.."

ކައްޕި: "ކަހަނބޭ.... މި ދޯންޏަކު ކަހަނބެއް ނޯންނާނެ.."

ރަމީޒު: "އެހެން ވިއްޔާ ބުނެބަލަ... މިއިން ދުވަހެއްގަ މި ދޯންޏަށް ކަހަނބެއް ހިފައިގެން ނެގިންތަ..؟"

ރަމީޒުގެ މި ސުވާލުގެ ސަބަބުން ކައްޕި ބިރުން ދާހިއްލާ ފޯވަން ފަށައިފިއެވެ. ވެލާ ކަހަނބަކީ ހިމާޔަތް ކުރެވިފައިވާ އެއްޗެހި ކަމުން، އޭގެ އެއްޗެއް ހިފައިފި ނަމަ ބޮޑު ހުކުމެއް އަންނާނެކަން ކައްޕިއަށް އެނގެއެވެ.

ކައްޕި: "އަސްލު ތިކަންތައް ވީ އެހެން ގޮތަކަށް އިނގޭތޯ.. އަޅުގަނޑު.."

ކައްޕިގެ ކަރުތެރެ ބެދޭ ގޮތްވެ އަނގައޮޅެން ފެށިއެވެ.

ކައްޕި: " އަޅުގަނޑުމެން ދޯނި ކުއްޖެއް ފީނަން އުޅެނިކޮށް ފެނުން ކަހަނބެއް... އޭނަ އޭތި ނެގީ އޭގެ ބުރަކަށިމަތީގަ ފާޑެއްގެ އެއްޗެއް ހަރުކޮށްފަ އިނީމަ.. އޭނަ ބުނި އެއީ ނިއުކުލިއަރ ބޮމެކޭ... ރާއްޖެއަށް ކޮންމެސް ބަޔަކުން ހަމަލަ ދޭން ފޮނުވާފަ އިން އެއްޗެކޯ.."

ކައްޕިގެ މިވާހަކަ ތައް އަޑު އިވިފައި ކަހަނބު ގެ ވާހަކަ ބޭ އިޚްތިޔާރުގައި އެންމެނަށް އަހާލެވުނެވެ.

"ދެން ކޮބާތަ ކަލޭމެން ހިފި ކަހަނބު..."

ކައްޕި: "އަޅުގަނޑުމެން  އޭތި ކާލައިފިން... އެކަމަކު އޭގަ ހަރުކޮށްފަ އިން އެތި އިންނާނެ އިންޖީނު ގެ ތެރެއަށް ލާ ފޮރުވާފަ.. މާފުކުރައްވާ... އަޅުގަނޑުމެން އޭގެ ކަހަނބެއް ހިފައިގެން ގެނެސް ދެންތޯ.. ނޫނީ.."

ކައްޕި އަށް ބިރުން ރޮވެން ފެށުނެވެ. މައްސަލަ ބޮޑުވެދާނެތީ އާދޭސް ކުރަން ފެށުނެވެ.

ކައްޕިގެ ވާހަކަ އަޑުއެހުމަށް ތިބި ޓީމުގެ މީހުން މާޔޫސް ވެއްޖެއެވެ. ކައްޕިގެ ވާހަކަ މެދު ކަނޑާލާފާ ފަރީދު ވާހަކަ ދައްކަން ފެށިއެވެ.

ފަރީދު: "ތަނަކުން އެއްޗެއް ފެންނަ އިރަށް ކާލަން ޖެހޭތަ.. ކަހަނބެއް ބޭނުމެއް ނޫން.. އޭގަ ހަރުކޮށްފަ އިން ޓެގް ގެނެސްދީ.. ވީ ކަމެއް ނުވާ ކަމަކަށް ނުވާނުން.."

ކައްޕި ތެދުވެރިކަމާއެކު ކަންތައް ވީގޮތް ކިޔައިދިނުމުން، ޓީމުގެ އެންމެން ނިންމީ އެހިސާބުން އެ ޓެގް ހިފައިގެން އެނބުރި ދިޔުމަށެވެ.

ތެދެކެވެ. ތަނަކުން އެއްޗެއް ފެންނަ އިރަށް އެއެއްޗެއް ކާލާކަށް ނުޖެހެއެވެ. ވެލާ ކަހަނބު މަހަކީ މީރު މަހެއް ކަމުގައި ވާތީ ގިނަބަޔަކު ވެލާ ކަހަނބު ހިފަމުންދިޔައެވެ. އެއްދުވަސް ވަރެއްގައި ވެލާ ކަހަނބު މަހަކީ ޙަރާމް އެއްޗެއް ކަމުގައި މައުމޫނު ސަރުކާރުގެ އިލްމުވެރިޔަކު ފަތުވާވެސް ދެއްވާފައި ވެއެވެ. (ނައިފަރު އަޕްޑޭޓް ނިއުސްޓީމް) ކޑޒ

އިތުރަށް.. »

ކުޅެލެވޭނީ ކުޅެވޭވަރުގެ މީހުންނާ...

އިމާމުން ތަމްރީނު ކުރާ ކޯހަކީ ކީރިތި ޤުރުއާނާ ބެހޭ މަރުކަޒުން އެތައް ބަޔަކަށް ހިންގާފައިވާ ކޯހެކެވެ.  އެގޮތުން އެންމެ ގިނަ ބަޔަކު ހަދަމުންދާ މި ކޯހަކީ ރަނގަޅު ފެންވަރުގެ އިމާމުން ރާއްޖޭގެ މިސްކިތްތަކުގައި އިމާމުވެ ނަމާދު ކުރުމަށް ތަމްރީނު ކުރުމަށް ދެވޭ އެންމެ ފުރިހަމަ ތަމްރީނެވެ. ރާއްޖޭގައި އޭރުވެސް މިހާރުވެސް އިމާމުން ތަމްރީނުކުރަނީ މި މަރުކަޒުންނެވެ. މޫސާމަނިކަކީ ހުރާއިން އިމާމު ކޯސް ހެދުމަށް އައިސް އުޅުނު އެރަށު މިސްކިތެއްގެ މުދިމެކެވެ. ކޯހުގައި ދުވަސް ތަކެއް ވީއިރު މޫސާ މަނިކަށް ވަނީ އެތައް ބައިވަރު ރަހުމަތްތެރިންނެއް ލިބިފައެވެ. ފަހުމީ އަކީ މާކުރަތު މީހެކެވެ. މީހުންނާއި ގުޅޭ ސަކަ މިޒާޖެއްގެ މީހެކެވެ.  އިމާމު ކޯހުން ފާސް ވިޔަސް ފަހުމީ އަކީ ފިސާރި ގަޅި މީހެކެވެ. ކުރުކޮށް ފޮނިކޮށް ބުނާނަމަ ތަނަކު ހުރި ދެބޯ ބުރާންޗެކެވެ.

އިމާމު ކޯސްނިމި މޫސާމަނިކުގެ ދަޢުވަތަކަށް ފަހުމީ ހުރައަށް ދިޔަ ދުވަހެކެވެ. ދުވަހަކީ ހުކުރު ދުވަހެވެ. ހުކުރުކުރަން ހަމަޖެހިފައިވާ ޚަތީބު (ޚުތުބާ ކިޔާ މީހާ) ޚުތުބާގެ މެދު ތެރެއިން ހަދީޘެއްގެ ރާވީ އެއް (ޙަދީޘް ރިވާކުރައްވާ ބޭކަލުން) ގެ ނަން ކިޔާލުމުން، ފަހުމީ އަށް ކުއްލި ޝޮކެއް ލިބުނެވެ. އަދި ހިތާ ހިތާ ބުނެލެވުނެވެ. ޔަޤީނެވެ. މީނަ މަށަށް ދެއްކެން މޮޅުވެލީއެވެ. ކޮންމެއަކަސް ފަހުމީގެ ބުރާންތި ސިކުނޑިން ފަހުމީއަށް ވިސްނައި ދިނީ އެހެން އެއްޗެކެވެ.

ޒަމާންތަކަކަށް ފަހު، ފަހުމީގެ ދައުވަތަކަށް މޫސާ މަނިކު މާކުރަތަށް ދިވެހި ބޭހަކަށް ދިޔައެވެ. އޭރު ފަހުމީ އަކީ އެރަށު މިސްކިތުގެ މުދިމެވެ. މިސްކިތަށް ނަމާދަށް ދާއިރު ދަނީވެސް މޫސާމަނިކު ގޮވައިގެންނެވެ. މޫސާމަނިކަކީ ރީތި މަޚުރަޖަކާއި އޮމާން އަޑެއް ލިބިފައިވާ މީހަކަށް ވާތީ، އޭނާގެ ކިޔެވުން އަޑު އިވި މީހަކު ފަހުމީއަށް ކުޑައިމީސް ބަހެއް ބުނެފާނެކަމަށްޓަކައި، ފަހުމީ މޫސާމަނިކު ލައްވާ މެންދުރު ނަމާދާއި، އަޞުރު ނަމާދު ފިޔަވައި އެހެން އެއްވެސް ނަމާދެއް ނުމެ ކުރުވައެވެ. މިގޮތުގައި ހަފްތާއެއް ވަރު ވީ ތަނާ، ހުކުރު ކުރާ ތަރުތީބުން، ހުކުރުކުރަން މިޖެހުނީ ފަހުމީއަށެވެ.

ހުކުރު ޚުތުބާ އަކީ އަބަދުވެސް ފަހުމީ ކިޔާ ޚުތުބާ އަކަށް ވުމުން، ޚުތުބާ ވަނީ ގޮތަކަށް ހިތުދަސްވެފައެވެ. ހުކުރު ކުރުމަށް މިންބަރަށް އެރުމަށް ފަހު، ޙާޒިރީންނަށް (ހުކުރަށް އައިސްތިބި މީހުންނަށް) ސަލާން ގޮވާލުމަށް ފަހު، ހުކުރުގެ ބަންގި މޫސާމަނިކު ދިނުމުން ފަހުމީ ޚުތުބާ ކިޔަންފެށިއެވެ. ޚުތުބާގެ ވަކި ހިސާބަކުން، އަރަބިން އޮތް ޙަދީޘެއް ކިޔަން ޖެހުނެވެ. ފަހުމީ ހިތަށް އެރިއެވެ. މިއީ ހުރައަށް ދިޔަ ދުވަހު، މޫސާމަނިކު ކީ ޚުތުބާއެވެ. އޭނަ މަށަށް ލަނޑެއް ދޭން މިއޮތީ މިއަށް ބަދަލު ގެނެސްފައެވެ. އަޑަށް ލެވުންޙާ ބާރެއް ލާފައި ދެފަހަރަކު ތަކުރާރުކޮށް ކިޔާލިއެވެ. 

عَن اَبِي مـــَــاكُرَةُ رَضِيَ اللَّه عَنْه قـــَالَ   ޢަން އަބީ މާކުރަތު ރަޟިޔަﷲ ޢަންހު ޤާލަ..

ހުކުރުކޮށް ނިމިގެން ގެއަށް އައި މަގުމަތީ، ފަހުމީ ، މޫސާމަނިކާ ދިމާއަށް ބުންޏެވެ.

ފަހުމީ: "ކުޅެލެވޭނީ ކުޅެވޭވަރުގެ މީހުންނާ... ކަލޭ ހީކުރީ މަށަށް އޮޅުވާ ލެވޭނެ ކަމަށް ދޮތަ..!"

ވާނީވެސް އެހެން ތާއެވެ. ހުރާގައި ކިޔަން ޖެހޭނީ ހުރާ ލައިގެންނެވެ. މާކުރަތުގައި ކިޔަން ޖެހޭނީ މާކުރަތު ލައިގެންނެވެ. ޚުތުބާ އަޑުއަހަން ތިބި ތަންދޮރު ދަންނަ ގިނަ ބަޔަކު ތިބީ ދޮޅު ރޯނާ ވެފައެވެ. އަހަރެން ވާ އެއްޗެއް ބުނާކަށް ނެތީމެވެ. ފަހުމީއަށް ވަރަށް ސަލާމެވެ.

ނައިފަރު އަޕްޑޭޓް ނިއުސްޓީމް (ކޑޒ)

އިތުރަށް.. »

ކަލޭގެފާނު ދެއްވައިފިއްޔާ ގެންދާނަމެވެ.

ދުވަސްވަރަކީ ދެވަނަ ބޮޑު ހަނގުރާމައިގެ ސަބަބުން، ރާއްޖޭގެ ރައްޔިތުން ކާނެ އެއްޗެއް، ބޯނެ އެއްޗެއް ނުލިބި، ބަނޑަށް މަރުވަމުން ދިޔަ އެންމެ ތަދު ދުވަސްވަރެވެ. ރާއްޖޭގެ ރައްޔިތުން ދެކެފައި ނުވާ އެންމެ ދަތި "އެކަކު ގައިގަ އަނެކަކު ދަތް އަޅާ ވަރުގެ" ދުވަސްވަރެވެ. ބަނޑުހައިކަމުގެ ސަބަބުން، އެކި ވައްތަރުގެ ފަތްޕިލާވެއްޔާއި ވާ ކައިގެން ގަސްދޮށަށް ވެއްޓިފަހުންނަ ގަސްގަހުގެ މޭވާ ކެއުމުގެ ސަބަބުން، އެތައްބަޔަކު ވަނީ ކާނާ ވިހަވެފައެވެ. އެގޮތުން އެންމެ ގިނަ މީހުން ކެއި ކަމަށް ވަނީ ޅޮސްފަތާއި، މަގޫފަތެވެ.

އުއްސަކުރު ޒަމާނަކީ މި ދުވަސް ވަރަށް ކިޔައި އުޅުނު ނަމެކެވެ. ކޮންމެ ރަށެއްގައި ކާޑު ހަވާލު ކުރާ އޮފީހެއް (ކ.ހ އޮފީސް) ހުރެއެވެ. އެއީ މާލެއިން ފޮނުވާ ކާޑުގެ ބާވަތްތައް ރަށުގެ ރައްޔިތުންނަށް އެންމެ އިންސާފުވެރިކޮށް ބެހުމަށް އަތޮޅު އޮފީހުން ހަމަޖައްސާ ވަކި ބަޔަކު ތިބޭ ތަނެކެވެ. ކޮންމެ މީހަކަށް ބޮލަކަށް ދޫކުރަނީ ދުވާލަކަށް ބައި ގާ (ބައި ކިލޯ) ފުށް، ނުވަތަ ހަނޑޫ، ނުވަތަ ހަކުރެވެ. މި ދަތި ދުވަސްވަރުން މިންޖު ކުރައްވާތޯ މާތް ދޭވަތާއިންގެ ކިބަޔަށް ދުއާ ކުރުމާއި، ޒިޔާރަތްތަކަށް ނަދުރު ނުބުނާ މީހަކު މަދުވާނެއެވެ.

އިހުޒަމާނުގެ މީހުން ގަބުލުކުރާ ގޮތުގައި ޒިޔާރަތް ތަކުގައި ފަސްދާނުލެވިފައިވާ ބައެއް ދަންނަ ބޭކަލުން ނުވަތަ ވަލީވެރިންނަކީ، މީހުންގެ މުހުދާތުތައް (ބޭނުންތައް) ފުއްދައި ދެއްވާ ބޭކަލުންނެވެ. އެގޮތުން ތަބުރޭޒުގެފާނުގެ ޒިޔާރަތާއި، ހއ. އުތީމު ގައި ހުންނަ މުހައްމަދު ތަކުރުފާނުގެ ގަނޑުވަރުގައި ހުންނަ ޒިޔާރަތާއި، ރ. ކިނޮޅަހު ޒިޔާރަތާއި ބަރުބަރީގެފާނު ޒިޔާރަތަކީ އެންމެ ގިނަމީހުން ނަދުރު ބުނެ އުޅޭ ޒިޔާރަތްތަކެވެ. ނަދުރުބުނެ އުޅޭ ގޮތަކީ، އެނަދުރު ބުނާ މީހެއްގެ ބޭނުން ފުދިއްޖެ ނަމަ މިވެނި އެވެނި ކަމެއް ކުރާނަމޭ ނުވަތަ ޒިޔާރަތަށް ކޮންމެސް އެއްޗެއް ހަދިޔާ ކުރާނަމޭ މިފަދަ އިބާރާތަކުން މީހެއް ކައިރީ ނުވަތަ ބައެއްގެ ޙާޒިރުގައި ބުނާ ބުނުމެކެވެ. މިސާލަކަށް، އަންހެން ދަރިއަކު ނުލިބިގެން އުޅޭ މީހަކު، ތިމަންނާއަށް އަންހެން ދަރިއަކު ލިބިއްޖެނަމަ ކިނޮޅަހު ޒިޔާރަތަށް ދޮޅިއްސަ ކާށިން ނަދުރު ބުނެފިމޭ ބުނެ އަންހެން ދަރިއަކު ލިބުމުން އެދަރިފުޅު ގޮވައިގެން ޒިޔާރަތަށް ގޮސް ޒިޔާރަތް ކައިރީ ކާށި ބަހައްޓަނީއެވެ. އަދި ކާށި ބަހައްޓާއިރު މިއީ ތިމަންނަ މިވެނި އެވެނި ކަމެއް ވުމަށް ނަދުރުބުނެ، އެ ކަން ހާސިލް ވުމުން ނަދުފުއްދުމަށް ގެނައި ތަކެތިކަމަށް ޒިޔާރަތް ކައިރީ ހުއްޓިހުރެ ބުނެތެވެ.

ނައިފަރު ތުއްތުބެ (އަސްލު ނަމެއްނޫން) ނަމަކަށް ކިޔާ މީހަކު ރާއްޖޭގެ އުތުރުގެ ރަށަކަށް ކޮންމެވެސް ބޭނުމެއްގައި ދަތުރެއް ކުރިއެވެ. ތުއްތުބެ އަކީ ހަރުކުލައިގެ މީހަކަށް ވެފައި ނައިފަރުގެ މީހުން ވަރަށް ޤަދަރު ކުރާ މީހެކެވެ. ރަށުގައި ކުޑަ ދުވަސްކޮޅަކު މަޑުކޮށްލުމަށް ފަހު، ފުރަން ކައިރި ވުމުން ރަށުގެ މީހުން ނަދުރު ބުނާ ޒިޔާރަތް ދޮށަށް ތުއްތުބެ ދިޔައެވެ. ރަށުގެ އެކި އެކި މީހުންނާއި، އަތޮޅުގެ އެކި އެކި ފަރުދުން ނަދުރުބުނެގެން ، ނަދުރު ފުއްދުމުގެ ގޮތުން ޒިޔާރަތަށް ވެދުން ކޮށްފައި ހުރި ބޮޑެތި ކާށި ފުނިތަށް ޒިޔާރަތް ކައިރީ ހުއްޓާފެނިގެން، މި ކާށިކޮޅު ގެންދާނެ ފިކުރެއް ތުއްތުބެ ކުރިއެވެ. ޖެހިގެން އައި ދުވަހު ހެނދުނު، ރަށުގެ ދެފިރިހެނުންނާއި އެކު، ތުއްތުބެ ފުނަ ދަނޑިއެއް ހޯދުމަށް ނިކުމެއްޖެއެވެ. ވަލުތެރެއިން ފުދޭ ވަރެއްގެ ތެދު ހައެއްކަ ފުނަ ދަނޑި ކަނޑައިގެން، ގެއަށް އައީ ޒިޔާރަތްމަގުން ލައިގެންނެވެ. ޒިޔާރަތް ކައިރިއަށް މަޑުކޮށްލުމަށްފަހު ތުއްތުބެ މަޑުމަޑުން އެބަހުރެ "ކަލޭގެފާނު ދެއްވަވައިފިއްޔާ، އަޅުގަނޑު ގެންދާނަމޭ.." ކިޔައެވެ.

ތުއްތުބެ މިކިޔާ އެއްޗެއް، އެކުގައި ދަނޑިކަނޑަން ދިޔަ އެކަކު އަހާލުމުން އެބަބުނެއެވެ. ޒިޔާރަތް ކަލޭގެފާނު އެބުނަނީއޭ، ކޮންއިރަކުންތޯ އޭ ފުރުއްވަނީ... ރަށަށް ދުރުވާއިރު މިތާމިހިރަ ކާށިކޮޅާއި އެއްޗެހި ގެންދަންވީނުންތޯއޭ.. އަހަރެން މިބުނަނީ އޭ، "ކަލޭގެފާނު ދެއްވަވައިފިއްޔާ، އަޅުގަނޑު ގެންދާނަމޭ.." އެވެ. ދެން އަހަރެން މި އަހާލީއޭ، މިއޮއްހާ ބައިވަރު ހަމަ އަޅުގަނޑަށް ތޯ އޭ... އެކަލޭގެފާނު އެބުނުއްވަނީއޭ އާދޭހޭ.. ހަމަ ތުއްތުބެއަށޭ... ގެންދަހަރޭ... އަހަރެން މި އަހާލީއޭ، މިއޮއްހާ ބައިވަރު ގެންދާނީވެސް ފަހެ ކިހިނަކުންތޯ އޭ.. ބުނީމަ އެކަލޭގެފާނު އެބަ ބުނުއްވައޭ، ރަށުކަތީބު ކައިރީ ނަންގަންނަހަރޭ... ޒިޔާރަތްކަލޭގެފާނު ބުނުއްވައިފިއޭ މިހެން.. ކަތީބަށް ނަންގަންނަވަނިކޮށް، ދޯންޏަށް ކާށިކޮޅު ބަރާކޮށްލަދެއްވާނޭ..." މިހެންނެވެ.

މިތާ ތިބި ދެ މީހުންނަކީ މިކަހަލަ ކަމެއް ދުވަހަކު ފެނިފައިވެސް ނުވާ އަދި ކިއެއްތަ ގަމާރު ދެސޮރުން ކަމަށް ވާތީ މީނާ ދެއްކި މި ވާހަކަ ގަބޫލުކޮށް، ހަލުވިކޮށް ގޮސް ކަތީބަށް ޚަބަރުކޮށްފިއެވެ. ކަތީބު ދުރުވެ އެކަން އެމަގަށް ކުރުމަށް ރައްޔިތުންނަށް އަންގައިފިއެވެ. ވާނީވެސް އެހެންތާއެވެ. މި ދިޔަ އެތަކެއް ޒަމާނުގައި މީހަކު "ތޯ ތޯ" އަކަށްވެސް މިކަހަލަ ވާހަކައެއް ނުބުނެއެވެ. އަދި ޒިޔާރަތަކީ ކަރާމާތްތެރި ތަނަކަށް ވާތީ، މިވާހަކަ ދޮގުވެސް ކުރެވޭކަށް ނެތެވެ. ފުރަން ތައްޔާރުވުމުން، ޒިޔާރަތަށް ނަދުރުބުނެގެން ވެދުން ކޮށްފައިވާ ހުރިހާ އެއްޗަކުން  ދޯނި ބަރާކޮށް "އެކަލޭގެފާނު ބުނުއްވިފަދައިން" މަސައްކަތްނިންމާ ޚަލާސްކޮށްފިއެވެ. އެފަހުން މިބަސް ބޭނުން ކުރެވެނީ، މީހަކު ވަރަށް ބޭނުން ވެފައިހުރި އެއްޗެއް، ވަރަށް ފަސޭހައިން، މީހަކު ދިނުމަށް އެއްބަސްވާ ހިނދު އެ ދަނޑިވަޅުގައި، ޝުކުރު އަދާކުރުމަށް ބުނާ ބުނުމެއްގެ ގޮތުންނެވެ.

(ނައިފަރު އަޕްޑޭޓް ނިއުސް ޓީމް) ކޑޒ

އިތުރަށް.. »